SALMOS 63:1-11

¹¡Toteco Dios, ta tinoDios! ¡Nelía tahuel nimitztemohua! ¡Quej se masehuali cati tahuel amiqui ipan huactoc tali campa amo onca at, na ica nochi noyolo huan ica nochi noalma nijnequi nimitzpantis!

²Nijnequi niquitas mochicahualis huan mohueyitilis quej niquitac ipan motiopa.

³Pampa motaicnelijcayo más hueyi ipati huan amo nonemilis. ¡Tahuel nimitzhueyimati!

⁴Huan nochi tonali quema noja niitztos, nimitztiochihuas. Huan moixpa nimomatananas huan nimotatajtis ica ta.

⁵Huan huajca, quena, nijmatis quej elisquía ya niixhuic ica se tacualisti cati ajhuiyac. Huan nimitzhueyimatis ica miyac paquilisti.

⁶Nochi yohuali quema nimoteca ipan notapech huan amo hueli nicochi, nimoilhuía ten ta. Quena, nimoyolilhuía ten ta sese hora.

⁷Nimoilhuía quenicatza techpalehuijtoc huan yeca sese tayohua tahuel nipaqui. Quej se piyo quintatía iconehua ieltapaltzala, quej nopa ta techtatía na para amo teno nechajsis.

⁸Nimotatzquilijtoc ipan ta pampa san ta techmocuitahuía ica mohueyi chicahualis.

⁹Nochi cati quinequij nechmictise yase micta.

¹⁰Pampa ya eltoc tasencahuali para miquise, huan para sequinoc quintzontamiltise ica macheta. Huan inintacayohua elis tacualisti para nopa tepechichime.

¹¹Pero na nitanahuatijquet nimopaquilismacas ipan ta, Toteco Dios. Huan nojquiya paquise nochi sequinoc cati senquisa motemachíaj ipan ta. Pero nochi cati istacatij, ta, Toteco, tiquincamatzacuas.