SALMOS 62:2-11

²Nimotlatía ipan ya para amo tleno nechajsis. San yaya nechmaquixtía huan nechmocuitlahuía quema huala tlaohuijcayotl. Amo tleno hueli nechpanos.

³Pero ¿hasta quema tlamis nocualancaitacahua nechhuilanase? Ayacmo nijpiya más chicahualistli quen tlanahuatijquetl ipan notlanahuatilis. Nocualancaitacahua quisencahuaj quenicatza huelis nechtlahuisose. Nechitaj quen se tlapepecholi o tepamitl catli quinequi huetzis.

⁴Quena, san moilhuíaj san sejco quenicatza huelis nechtzontlamiltise. Quinpactía quitlacaquilise istlacatili huan tlacajcayahualistli. Ica inincamac nechcamanalhuíaj yejyectzi, pero ipan ininyolo nechtelchihuaj.

⁵Pero na san nimochiya ipan Toteco Dios, san nimochiya para yaya ma nechmanahui, pampa san ya hueli temaquixtía.

⁶Nimotlatía ipan ya para amo tleno nechajsis. San yaya nechmaquixtía huan nechmocuitlahuía quema huala tlaohuijcayotl, yeca san ipan ya nimotemachía.

⁷San Toteco Dios hueli nechmaquixtis huan sempa nechhueyitlalis iniixpa sequinoc. Yaya nechtlatía huan nechfuerzajmaca. Nechmocuitlahuía para amo ma nechajsi catli fiero.

⁸¡Annomasehualhua, nochipa ximotemachica ipan Toteco Dios! Xijpohuilica nochi catli eltoc ipan amoyolo, pampa san yaya hueli techmocuitlahuis ica catli amo cuali.

⁹Amo tleno nelía ininpati masehualme iixpa Toteco, masque catli tominpiyaj o catli teicneltzitzi. Sintla se quintlalisquía ipan balanza para quintamachihuas sintla etique quen se tlamantli catli tlahuel ipati, momacas cuenta para melahuac amo etique pampa masehualme itztoque san quen ajacatl.

¹⁰Masehualme, amo ximoilhuica para antlahuilanase para anquitlanise más tomi. Amo ximoilhuica para antlachtequise para anmoricojchihuase. Huan sintla anmochihuase rico, amo ximohueyimatica, niyon amo ximotemachica ipan amotomi.

¹¹Nijmati ya ni, pampa miyac hueltas Toteco Dios nechilhuijtoc: san yaya quipiya nochi chicahualistli.