SALMOS 5:3-12

³Sese ijnaloc nelcualca nimitzpohuilía tlen nopanti, TOTECO. Mojmostla nimitztlajtlanía tlen monequi, huan san nimochiya para tinechnanquilis.

⁴Ta tiToteco Dios tlen ax mitzpactía tlen ax cuali. Yeca ax tiquincahuilía ax cuajcualme ma itztoca mohuaya.

⁵Tlen mohueyimatij ax hueli moquetzase moixpa. Ax tijnequi tiquinitas nochi nopa tlacame tlen quichihuaj tlen ax cuali.

⁶Tiquintzontlamiltía tlacame tlen istlacatij. Quena, TOTECO, ax tijnequi tiquinitas tlen tlacajcayahuaj huan temictíaj.

⁷Pero na, pampa hueyi moteicnelijcayo, huelis nicalaquis mochaj. Quena, huelis nimitzhueyichihuas ipan motlatzejtzeloltijca tiopa, pampa nimitztlepanita huan nimajmahui para nimitzixpanos.

⁸TOTECO, xinechyacana queja nohuaya timocajtoc tijchihuas, pampa itztoque nocualancaitacahua. Xinechnextili moojhui tlen xitlahuac.

⁹Nocualancaitacahua ax quema quiijtohuaj tlen melahuac. Axaca hueli motemachía ipan inintlajtol. Ipan ininyolo san quinequij tetzontlamiltise. Inincamac eltoc fiero queja quema quitlapohuaj se mijca tlacoyoctli. Tecamahuíaj ica tlajtoli tlen yejyectzi san para tlacajcayahuase.

¹⁰Xiquintlatzacuilti, noTeco Dios. Xiquinmasilti ica tlen ax cuali moilhuijtoque quinchihuilise sequinoc. Xiquinhuejcamajcahua pampa miyac inintlajtlacolhua. Quena, xiquinhuejcamajcahua pampa mohuejcachijtoque tlen ta.

¹¹Pero ma paquica nochi tlen motemachíaj ipan ta para xiquinpalehui. Nochipa ma huicaca ica paquilistli pampa ta tiquinmanahuía. Tlen mitzicnelíaj paquij ipan ta.

¹²Pampa ta, TOTECO, tiquintiochihua tlen quichihuaj tlen xitlahuac moixpa. Moteicnelijcayo quinyahualohua queja se tepos pantzajcayotl tlen quinmocuitlahuía.