Salmos 5:1-11

¹Namakmalad-e-iduedga soglenaid: Gar-gammuba namaklegoye. David we-namaked narmaksad. Bab-Jehováʼye, an bega ibmar-sogedi, be an-itoge. Nunmakedgi an bega ibmar-biedi, nue be an-itoge.

²Bab-Jehová, be an-Bab-Dummad gued, be an-rey gued. Ar an bese gornaisoggu, an bese wilenaidi, nue be itosunna.

³Bab-Jehová, wakudaryalaba an bese-goledi be an-itodaed, wakudaryalaba an-wile-naidi, an bega sognonidaed. Be-an-abin-imakedi, an edarbedidaed.

⁴Bab-Dummad, ar bedi ibmar-isgana abesulid, Dule-isgana be-walikaa gudii guosulid.

⁵Dule-san-dummarba-imakmalad, bese gwen dogosulid. Dule-ibmar-isgana-imakmalad, nue-sae be dakdaed.

⁶Dule-gakansamalad be obelogoed. Bab-Jehová, bedi dule-gindakmalad, dule-yardakmalad, nue-sae dakdaed.

⁷Bab-Dummad, ar bedi nue-wile-an-daksoggu, andi nabir bese-goled-negse dogsunnad. Nabir an be-neg-islidikidsik sindigar-ataksii an be-nug odummosunnad.

⁸Bab-Jehováʼye, an-isdarmalad an bukidar-nikadba be-igar-innikigwadba be an-nie. Be-Igar-Maid magar-dakega be an-imake.

⁹Dule-isganamar innikigwadba sunmaksurmalad, e-ulubgi ibmar-isgana-imakedginbi binsadimalad. Yamo dule-nug-odummogar sunmakmalad, yardakar emar-obelogega, guagwar bukwamalad.

¹⁰¡Bab-Dummadye, a-dule-isganamar be sabsur-odurdake! Dule-isganamar yamo dule-yardaked-igar mesismalad. A-igar na dukin egi aibinega be imake. We-dulemar gannar-gannar ibmar-isgana-imakdimalad-ular, be obane. Ar ade, begi nue-gwisgusmalad.

¹¹Dule-begi-bendakleged-amidimaladi, wergumarsun, degisadegu weligwar namakmarsun. Bab-Dummad, be amar-bendakdaed. Dule-be-sabgudimaladi, begi wergumarsun.