SALMOS 58:5-11

⁵Monacastzacuaj huan ayecmo quichihuilíaj cuenta, masque inintecohua quintatzotzonilíaj cuajcualtzi para ma quinneltocaca. Huan nimantzi tetzacaníaj. Quej nopa itztoque ni fiero masehualme.

⁶NoTeco Dios, xiquintamiltili ininchicahualis. Quena, xiquinquixtili ininchicahualis nopa masehualme cati mosisiníaj, quej tiquinquixtilisquía inintancoch huan inintacuayo nopa tecuanime.

⁷Ma ixpolihuica quej ixpolihui nopa at cati toyahui ipan huactoc tali. Huan nopa teposti cati quipixtoque inimaco para ica tatehuíaj, ma eli quej amo teno ipati.

⁸Ma elica quej nopa tenaquisti cati atiya quema noja nentinemi. O ma elica quej se pilconetzi cati tacatqui mictoc huan cati amo quema quiitac tatanexti.

⁹Toteco Dios quinixpolihuiltis cati huehuentzitzi huan cati telpocame. Quintzontamiltis nelnimantzi quej se chachapali cati nimantzi totoniya ica nopa tit cati lementoc ica huitzcuahuit.

¹⁰Pero cati itztoque xitahuaque iixpa Toteco, paquise quema quiitase para Toteco ya momacuectoc ica nopa masehualme cati amo teno quitepanitaj, huan moicxipajpacase ica inieso nopa masehualme.

¹¹Huan huajca nochi masehualme quiijtose: “Nelía quiselíaj se cuali taxtahuili nopa masehualme cati itztoque xitahuaque, pampa melahuac itztoc se Dios cati tetajtolsencahua xitahuac ipan ni taltipacti.”