SALMOS 57:2-11

²Nijtzajtzilis Toteco Dios Tlen Más Hueyi. Quena, nijnojnotzas Toteco Dios tlen nochipa nechpalehuía ipan nochi tlamantli.

³Tlen elhuicac nechtitlanilía itlapalehuil para nechmaquixtis. Yajaya nechchololtis ininmaco nocualancaitacahua tlen ica miyac cualantli nechtepotztocatinemij, huan quinequij nechtzontlamiltise. Pampa yajaya Toteco Dios temachtli huan tlahuel nechicnelía.

⁴Nechyahualojtoque tlacame tlen mosisiníaj queja tecuanime. Inintlajtol eltoc queja tlitl tlen quisa inincamaco. Inintlancoch tlajtlatequi queja cuatlamintli huan ininnenepil tlatequi queja machete.

⁵NoTeco Dios, nochi ma mitzhueyichihuaca ipan nochi elhuicactli. Mohueyitilis ma quitemiti ni tlaltepactli.

⁶Nocualancaitacahua quitlalijtoque se tlaquetztli para ma nimasi, yeca tlahuel nimajmahui. Nojquiya quichijque se tlacoyoctli ipan ojtli para ma nihuetzi ipani, pero xiquita inijuantijya huetzque nopano.

⁷NoTeco Dios, ipan noyolo nipaqui huan nijpiya tlasehuilistli. Huan yeca nimocualtlalijtoc para nihuicas huan nijsencahuas tiohuicatl para ta.

⁸Na nimocualtlalía para nijtzotzonas noarpa huan noguitarra. Cualca niisa para nimitztlatzotzonilis.

⁹Na nimitztlascamatis iniixpa tlacame pampa ta, Toteco, tinechchihuilijtoc miyac tlamantli tlen yejyectzi. Huan nihuicas para nimitzhueyimatis iniixpa tlacame tlen nochi tlaltini.

¹⁰Moteicnelijcayo nelhueyi queja ipatlajca elhuicactli huan huejcapantic hasta quionpano mixtli. Ta tlahuel titemachtli.

¹¹Toteco Dios, nochi ma mitzhueyichihuaca ipan nochi elhuicactli. Mohueyitilis ma quitemiti ni tlaltepactli.