SALMOS 56:9-12

⁹NoTeco Dios, quema nimitztzajtzilía para techpalehui, nochi nocualancaitacahua nimantzi cholohuaj. Quej nopa eli pampa cuali nijmati para ta tiitztoc nohuaya para techpalehuis.

¹⁰Na nimotemachía ipan Toteco Dios. Quena, nimopaquilismacas ipan TOTECO icamanal, por nochi cati nechtajtolcahuilijtoc nechchihuilis.

¹¹Quena, nimotemachía ipan Toteco Dios huan amo nimajmahui. ¿Taya huelis nechchihuilis se masehuali?

¹²NoTeco Dios, nochi cati nimitztajtolcahuilijtoc, nijtamichihuas. Nimitztascamatilis ica tiohuicat pampa techpalehuijtoc miyac.