SALMOS 51:6-17

⁶Ta tijnequi se tlacatl ma mitztlepanita ipan iyolo; tijnequi ma tijchihuaca san tlen melahuac. Xinechchihuili na ma nijmati motlalnamiquilis hasta campa más huejcatla ipan noyolo.

⁷Xiquijtzelo nopani nopa estli tlen tetlapajpacchihua, huan queja nopa nimocahuas nitlapajpactic. Quena, xinechpajpaca, huan nimocahuas onpano nichipahuac moixpa.

⁸Huan teipa quema ya tinechtlatzacuiltijtos, xijchihuas para sampa ma niyolpaqui. Huan elis queja sampa moyancuilise noomiyohua tlen tijtlatixchijtoc.

⁹Amo xijsenhuiquili xijtlachilijto notlajtlacolhua. Xiquixpolo tlen moixpa nochi tlen ax cuali nijchijtoc.

¹⁰NoTeco Dios, xijchihua para noyolo ma eli yancuic huan tlapajpactic. Xijchihua para ma nimoyolilhuis san ipan tlamantli tlen cuali, huan para ma nijnequis nijchihuas san tlen xitlahuac.

¹¹Amo xinechiyocacahua tlen ta moixpa, niyon amo xinechquixtili moTonaltzi tlen tlatzejtzeloltic.

¹²Xijchihua para sampa ma nijmati nopa paquilistli tlen nijpixqui pampa ta tinechmaquixti. Ica moTonaltzi xinechchihuili para nochipa ma nijnequis nimitztlepanitas.

¹³Huan huajca niquinnextilis moojhui sequinoc tlajtlacolchihuani tlen tlaixpanotoque queja na. Huan tlajtlacolchihuani moyolcuepase huan hualase campa ta.

¹⁴Toteco Dios, ta tlen tinechmaquixtía, xinechmanahui tlen ni tlaeticayotl tlen nijpiya pampa nitemicti. Huan huajca nihuicas tiohuicatl para niteyolmelahuas para ta tijchihua tlen senquistoc xitlahuac.

¹⁵Toteco, xijchihua para sampa ma nihuica, huan nitepohuilis nochi tlen tinechchihuilijtoc huan na nimitzpaquilismacas.

¹⁶Pampa ta ax tijnequi ma nimitzmaca tlacajcahualistli para tinechtlapojpolhuis. Intla queja nopa elisquía, huajca ica paquilistli nijchihuasquía. Pero ax mitzpactía ma niquintlali tlapiyalime ipan tlaixpamitl para niquintlatis moixpa, queja se tlacajcahualistli tlatlatili.

¹⁷Ta tijnequi ma nimoyolcoco, huan ma nimocueso ica nochi tlen ax cuali nijchijtoc, huan ma nimoyolcuepa. Quena, nopa tlacatl tlen moechcapantlalía huan moyolcuepa, ta tinoTeco Dios, temachtli tijtlacaquilía huan ax tijhuejcamajcahua.