SALMOS 50:5-21

⁵“Xiquinsentilica nomasehualhua cati moiyocacajtoque ten na. Quena, ma hualaca nochi inijuanti cati quichijtoque se camanali nohuaya, quema nechmacaque tacajcahualisti huan quiijtojque para nechtoquilisquíaj.”

⁶Nochi ilhuicacti tepohuilía para Toteco Dios itztoc xitahuac. Huan para yaya nopa juez cati tetajtolsencahuas.

⁷“Xijtacaquilica nochi annomasehualhua, xijcaquica nochi cati niquijtos. Nimechtelhuis miyacapa ica nochi tamanti cati anquichijtoque, pampa na niDios huan niamoTeco.

⁸Amo nimechajhuas pampa amo antechmacaj tacajcahualisti, yon pampa amo anquinmictíaj tapiyalme huan anquintatíaj noixpa, pampa quena, ya nopa anquichihuaj.

⁹Pero amo ya nopa cati nijnequi. Amo monequi techmacaca tacajcahualisti, quej becerros huan oquich chivojme cati hualahuij ten amopotrero.

¹⁰Pampa na noaxcahua nochi tapiyalme ipan cuatitamit huan nochi huacaxme cati tacuajtinemij ipan nochi tachiquilme.

¹¹Niquinixmati nochi totome campa hueli huan nochi tapiyalme cati nemij cuatita, pampa noaxcahua.

¹²Sinta nimayanasquía, amo nimechtajtanisquía techtamacaca, pampa ni taltipacti huan nochi cati eltoc ipani noaxca.

¹³¿Anmoilhuíaj nimotacualtía ica torojme ininacayo, huan niqui inieso oquich chivojme? ¡Amo!

¹⁴Nijnequi techtascamatilica ica nochi cati nimechchihuilía huan ya nopa niquitas quej se tacajcahualisti. Xijtamichihuaca nochi cati anquiijtojtoque para anquichihuase.

¹⁵Huan technojnotzaca quema anmotequipachohuaj, huan na nimechmanahuis huan amojuanti antechnextilise miyac tatepanitacayot.”

¹⁶Pero Toteco quinilhuía masehualme cati amo cuajcualme: “Amo anquipiyaj tequiticayot para ancamanaltise ten nopa camanal sencahuali, cati quiijtohua cati nimechmacas, yon amo hueli antepohuilise notanahuatilhua.

¹⁷Pampa amo anquicaquij quema nimechtacahualtía, yon amo anquichihuilíaj cuenta nocamanal.

¹⁸Quema anquiitaj se tachtejquet, anmohuampochihuaj ihuaya, huan nojquiya anmohuicaj inihuaya cati quichijtinemij ten hueli ica cati amo inintahuical.

¹⁹San campa hueli anquicalaquijtinemij amonenepil para anquiijtose cati fiero. Nimantzi anistacatij.

²⁰Anmosehuíaj huan anquitelhuíaj se cati amonelicni. Quena, yaya cati nojquiya icone amonana huan san sejco anmoscaltijque, anquitaijilhuíaj.

²¹Nochi ya ni anquichijtoque, huan na amo teno niquijtojtoc. Huajca anmoilhuijtoque para na nieli san se quej amojuanti. Pero ama nimechixcoilhuis nochi cati anquichijtoque, huan nimechpannextilis nochi.