SALMOS 50:4-22

⁴Toteco Dios quinnotza nochi tlen itztoque ipan elhuicactli huan ipan tlaltepactli, para ma quihualtlachilica quejatza quintlajtolsencahuas itlacajhua. Quiijtohua:

⁵“Xiquinsentilica notlacajhua tlen moiyocacajtoque noca na. Quena, ma hualaca nochi inijuanti tlen quichijtoque tlajtol sencahuali nohuaya, quema nechmacaque tlacajcahualistli huan quiijtojque para nechtoquilisquíaj.”

⁶Nochi elhuicactli tepohuilía para Toteco Dios itztoc xitlahuac. Huan para yajaya nopa juez tlen tetlajtolsencahuas.

⁷“Xijtlacaquilica nochi innotlacajhua, xijcaquica nochi tlen niquijtos. Nimechteilhuis tlamiyacapa ica nochi tlamantli tlen inquichijtoque, pampa na niDios huan niimoTeco.

⁸Ax nimechajhuas pampa ax innechmacaj tlacajcahualistli, niyon pampa ax inquinmictíaj tlapiyalime huan inquintlatíaj noixpa, pampa quena, ya nopa inquichihuaj.

⁹Pero ax ya nopa tlen nijnequi. Para na ax monequi xinechmacaca tlacajcahualistli, queja becerros huan oquich chivojme tlen hualahuij imopotrero.

¹⁰Pampa na noaxcahua nochi tlapiyalime ipan cuatitlamitl huan nochi huacaxme tlen campa hueli tlacuajtinemij ipan senquistoc nochi tlachiquiltini.

¹¹Niquinixmati nochi totome campa hueli huan nochi tlapiyalime tlen nemij cuatitla, pampa noaxcahua.

¹²Intla nimayanasquía, ax nimechtlajtlanisquía xinechtlamacaca, pampa ni tlaltepactli huan nochi tlen eltoc ipani noaxca.

¹³¿Inmoilhuíaj nimotlamaca ica torojme ininnacayo, huan niqui inieso oquich chivojme? ¡Axtle!

¹⁴Nijnequi xinechtlascamatilica ica nochi tlen nimechchihuilía huan ya nopa niquitas queja se tlacajcahualistli. Xijtlamichihuaca nochi tlen inquiijtojtoque para inquichihuase.

¹⁵Huan xinechnojnotzaca quema inmocuesohuaj, huan na nimechmanahuis huan imojuanti innechnextilise miyac tlatlepanitacayotl.”

¹⁶Pero Toteco quinilhuía tlacame tlen ax cuajcualme: “Ax inquipiyaj tequihuejcayotl para incamatise tlen nopa tlajtol sencahuali, tlen quiijtohua tlen nimechmacas, niyon ax hueli intepohuilise notlanahuatilhua.

¹⁷Pampa ax inquicaquij quema nimechtlacahualtía, niyon ax inquichihuilíaj cuenta notlajtol.

¹⁸Quema inquiitaj se tlaxtejquetl, inmohuampochihuaj ihuaya, huan nojquiya inmohuicaj ininhuaya tlen quichijtinemij tlen hueli ica tlen ax ininnamic.

¹⁹San campa hueli inquicalaquijtinemij imonenepil para inquiijtose tlen fiero. Nimantzi inistlacatij.

²⁰Inmosehuíaj huan inquiteilhuíaj se tlen imonelicni. Quena, yajaya tlen nojquiya icone imonana huan san sejco inmoscaltijque, inquitlaijilhuíaj.

²¹Nochi ya ni inquichijtoque, huan na ax tleno niquijtojtoc. Huajca inmoilhuijtoque para na nieli san se queja imojuanti. Pero ama nimechixcoilhuis nochi tlen inquichijtoque, huan nimechpannextilis nochi.

²²Xijtlacaquilica ya ni, imojuanti tlen innechilcahuaj na, niimoTeco Dios. Intla ax innechilnamiquij, nimechhuejhuelos huan axaca itztos tlen huelis inmechmanahuis nomaco.