Salmos 50:3-22

³Anmar-Bab-Dummad-danikidi boo danisulid, e-iduale, soo-dummadi gadanikid, bela ibmar-ogumakdanikid. Burwa-oored bela Bab-Dummad-ebiris danikid.

⁴Bab-Dummad nibnegse gochad, napnegse gochabalid, e-dulamarga-igar-nabolesokalid dakdamalagar. Bab-Dummad weyob soged:

⁵“Anga dule-islidik-gudimalad onmakmalo, dulemar ibmar-ogumakar-uklegedgi anbo-igar-mesismalad, anga onmakmalo.”

⁶Nibneg soged: Bab-Dummad dulega igar-naboged-innikigwad maiye.

⁷“Israel-dulemar, an-itomala, an-sunmaksokalid nue-itomala. An-dulamar, an begi sunmaksokalid: Ani an be-Bab-Dummadid, unnila, anbi Bab-Dummad maid.

⁸Bemar anga ibmar-ogumakar-ukdamaladgi an yolesulid. Bemar anga gusgu ibmar-nued-ukdamaladgi an yolesulid.

⁹Be-moli-bebe-nikad-sapingana e-galugi-bukwadbina an sogsulid. Be-sibad-machergan e-galugi-bukwadbina an sogsulid.

¹⁰Ar bela ibmar-durgan-sapurba-bukwad, angadbiid, bela molimar-yalaganba-bukwad, angadbiid.

¹¹Bela nuumar-sapurba-bukwad angi yoggusisulid, bela ibmar-durgan-yalaganba-gudinanaed, angadbiid.

¹²Degisoggu, an mas-gunbiele, an bese gochasuliled. Ar bela we-napneg, angadbiid, bela ibmar-we-napneggi-bukwad, angadbiid.

¹³¿Ar moli-bebe-nikad-e-san-gunnedgi an gudisi? ¿Ar sibad-machered-e-ablis-gobedgi an gudisi?

¹⁴Anga weligwaledgi dog-nuedye be sogdage. Anga, Bab-Dummad-Bur-Biriginedga be ibmar-imakoye-sogsad, be imakdage.

¹⁵Bonigan-abalagi be gunaidgi, anse be gole, an be-bendaknonikoed. Bedi be an-nug-odummogoed.”

¹⁶Bab-Dummad dule-isganagardina, weyob soged: “¿Doa bega soge, An-Igar-Maid be absogoye? ¿Doa bega soge, An-Igar-Maidgi be sunmakoye?

¹⁷Ar be durdakleged-igar abesulid. An-gayaburba be isdarsun-daked.

¹⁸Ar be atursamalad-dakardibe, eba be naddaed, dule-gambasamalad nabir be daked.

¹⁹Be-gayadina ibmar-isganagi sulibinsa sunmaked, be-gwabindukudina, unnila, gakansaedginbi sunmaked.

²⁰Ar be-gwenadgi gusgu be yolegar sunmaked, amba be-gargwenadgine be gakansabalid.

²¹Bela be we-ibmar-imaksadba, an bese gochasulid. Ande beyobye, ¿be binsasunde? Emisgindi, an bese urwoed. Bega an bakar ibmar sogoed.

²²Bemar an-ieddamalad, an bega ibmar-sogsad nue egi be binsamalo. Degisulile, anse be ibitomaloed, dule-wargwensaale be-bendakosurmalad.