SALMOS 49:5-18

⁵¿Para tlen monequi nimomajmatis quema hualas tlaohuijcayotl, huan quema nopa tlajtlacolchijca tlacame tlen nechcocolíaj hualase nechyahualoquij?

⁶Inijuanti motemachiyaj ipan inintomi, huan mohueyimatij pampa quipiyaj miyac tlamantli tlen pajpatiyo.

⁷Pero niyon se tlen inijuanti ax huelis momaquixtis tlen itlajtlacolhua, niyon ax huelis quimaquixtise se iniicni. Axaca huelis quitlaxtlahuis Toteco Dios para ma quimaquixtis.

⁸Pampa toyolis eltoc se tlamantli tlen miyac ipati. Ax onca niyon se tomi ipan nochi tlaltepactli tlen ica huelis moixtlahuas.

⁹¡Axtle! Axaca huelis quicohuas iyolis para itztos para nochipa huan para ax quema miquis.

¹⁰Nochi tlacame miquise. Tlen tlalnamiquij huan tlen mohueyimatij, huan nojquiya nochi tlen huihuitique, san se ininpanti. Mictehuaj huan quicajtehuaj nochi tlen pajpatiyo quipiyayayaj. Huan sequinoc moaxcatise.

¹¹Inijuanti moilhuíaj itztose para nochipa, yeca quicualtlalíaj ininchajchaj huan quitlalíaj inintoca ipan inintlal, queja elisquía iniaxca para nochipa.

¹²Pero se tlacatl ax huejcahuas yonque nelía tominpixtoc, pampa nojquiya miqui san se queja se cuatitlan tlapiyali.

¹³Nochi tlacame tlen motemachijtoque san ipan ininseltitzi, quipantise miquistli. Huan nojquiya miquise nopa tlacame tlen quintoquilíaj huan quihueyitlalíaj inintlajtol.

¹⁴Nopa tlacame miquise queja miquij borregojme. Quena, miquistli quinchiya nochi tlacame. Pero se tonal nopa tlacame tlen itztoque xitlahuaque iixpa Toteco Dios quinnahuatise tlacame tlen ax cuajcualme. Queja nopa elis quema ya palantose inintlacayohua nopa tlacame tlalijtic. Huajca quena, ipan nopa tonali nopa tominpiyani quicajtejtose huejca ininchajchaj tlen yejyectzi.

¹⁵Pero Toteco Dios nechmaquixtis tlen ichicahualis miquistli huan nechhuicas ihuaya.

¹⁶Amo ximocueso intla se tlacatl moricojchihua, huan mojmostla más quiyecchijchihua ichaj.

¹⁷Pampa quema miquis ax tleno huelis quihuicas. ¡Axtle! Quema quitemohuise itlacayo tlalijtic, niyon quentzi tlen yejyectzi quipixqui ax huelis yas ihuaya.

¹⁸Yonque se tlacatl itztos ica paquilistli quema noja yoltoc, huan sequinoc quitlepanitase pampa moricojchijtoc,