SALMOS 49:12-20

¹²Pero se masehuali amo huejcahuas masque nelía tominpixtoc, pampa nojquiya miqui san se quej se cuatitan tapiyali.

¹³Nochi masehualme cati motemachijtoque san ipan inijuanti iniselti, quipantise miquilisti. Huan nojquiya miquise nopa masehualme cati quintoquilíaj huan quihueyitalíaj inincamanal.

¹⁴Nopa masehualme miquise quej miquij borregojme. Quena, miquilisti quinchiya nochi. Pero se tonali nopa masehualme cati itztoque xitahuaque iixpa Toteco Dios quinnahuatise masehualme cati amo cuajcualme. Quej nopa elis quema ya palantose inintacayohua nopa masehualme ostoijtic. Huajca quena, ipan nopa tonali nopa tominpiyani quicajtejtose huejca ininchajchaj cati cuajcualtzi.

¹⁵Pero Toteco Dios nechmaquixtis ten ichicahualis miquilisti huan nechhuicas ihuaya.

¹⁶Amo ximotequipacho sinta se masehuali moricojchihua, huan mojmosta más quiyecchijchihua ichaj.

¹⁷Pampa quema miquis amo teno huelis quihuicas. ¡Amo! Quema quitemohuise itacayo ostoijtic, yon quentzi cati cuajcualtzi quipixqui amo huelis quihuicas.

¹⁸Masque se masehuali itztos ica paquilisti quema noja yoltoc, huan sequinoc quitepanitase pampa moricojchijtoc,

¹⁹ajsis se tonali quema miquis quej ihuejcapan tatahua, huan ayecmo quema quiitas taahuili.

²⁰Se masehuali cati moricojchijtoc, pero amo quielnamiqui para amo huejcahuas inemilis ipan ni taltipacti, mictehuas san se quej se cuatitan tapiyali.