SALMOS 47:5-8

⁵Toteco Dios tejcotoc campa tanahuatía. Nochi tzajtziyayaj ica paquilisti huan tapitzayayaj ica tapitzali quema TOTECO calajqui.

⁶Xihuicaca tiohuicat para tijpaquilismacase Toteco Dios. Xijhuicatica pampa yaya totanahuatijca.

⁷Toteco Dios, yaya nopa tanahuatijquet cati quinahuatía nochi ni taltipacti. Xijcualtalica se huicat cati cuajcualtzi huan xijhuicatica.

⁸Toteco Dios mosehuijtoc ipan isiyaj tatzejtzeloltic, huan tanahuatía ipan nochi talme.