SALMOS 47:1-8

¹Nochi anmasehualme ximomatlajtlaxcaloca. Xijpaquilismacaca Toteco Dios huan xihuicaca chicahuac.

²Pampa TOTECO yaya catli más hueyi huan temajmati. Yaya nopa hueyi tlanahuatijquetl catli quinahuatía nochi ni tlaltipactli.

³Quintzontlamilti pilaltepetzitzi toixpa huan quitlalijtoc nochi tlalme tomaco para tiquinnahuatise. Yeca tojuanti tlahuel tipaquij.

⁴Yaya quitlapejpenijtoc ni tlali para techaxcatis. Techmaca catli más cuali pampa techicnelía tojuanti tiimasehualhua.

⁵Toteco Dios tlejcotoc campa tlanahuatía. Nochi tzajtziyayaj ica paquilistli huan tlapitzayayaj ica tlapitzali quema TOTECO calaquiyaya.

⁶Xihuicaca tiohuicatl para ma tijpaquilismacaca Toteco Dios. Xijhuicatica pampa yaya totlanahuatijca.

⁷Toteco Dios, yaya nopa tlanahuatijquetl catli quinahuatía nochi ni tlaltipactli. Xijcualtlalica se huicatl catli yejyectzi huan xijhuicatica.

⁸Toteco Dios mosehuijtoc ipan isiya tlatzejtzeloltic, huan tlanahuatía ipan nochi tlalme.