SALMOS 46:2-10

²Yeca ax timajmahuise yonque ni tlaltepactli tlamixolehuis, huan yonque misahuise tepetini hasta itlatzintla nopa hueyi atl.

³Ma tlatomonijto nopa hueyi atl huan ma posoni miyac. Ma mojmolinica tepetini, pero ax nechmajmatis.

⁴Oncas se atlajtli tlen quinmacas paquilistli inijuanti tlen itztose ipan ialtepe Toteco. Huan nepa campa más tlatzejtzeloltic itztoc Toteco Tlen Más Hueyi.

⁵Toteco Dios mocahua ipan nopa altepetl, huan axaca huelis quixolehuas. Quema hualase icualancaitacahua, Toteco Dios ax huejcahuas, nimantzi quipalehuis ialtepe.

⁶Yonque tlahuelchihuaj tlacame ipan campa hueli tlaltini tlen ax quiixmatij Toteco, huan yonque tlanahuatiani huan inintlacajhua tzajtzij ica cualantli, ax tleno hueli quichihuase. Quema Toteco Dios camatis, quicaquise itos tlen caquistis queja tlatomoni, huan inijuanti motlancuaquetzase iixpa ica majmajtli. Huan ica itlajtol ni tlaltepactli atiyas.

⁷Toteco Dios Tlen Quinyacana Ielhuicac Ejcahua Ma Tlatehuitij itztoc tohuaya. Yajaya tlen techmocuitlahuía ama, yajaya iTeco tohuejcapan tata Jacob tlen huejcajquiya itztoya.

⁸Xihualaca xiquitaquij nochi nopa huejhueyi tlamantli tlen TOTECO quichijtoc. Quitlamixolejtoc tlaltepactli huan ama tlatzitzicatoc mocajqui.

⁹Yajaya quiquetza nochi tlatehuijcayotl hasta campa ontlantoc nochi tlaltepactli. Quipostectoc nochi cuahuitoli huan quixolejtoc nochi tlamantli para ica tlatehuise tlacame. Huan quintlatijtoc nochi tlatehuijca carrojme.

¹⁰Huan yajaya quiijtohua: “Ayoc ximolinica. Ximomacaca cuenta para na niimoTeco Dios. Na niquinnahuatía nochi tlacame ipan campa hueli tlali. Nochi tlen itztoque ipan ni tlaltepactli nechhueyitlalise.”