SALMOS 45:5-16

⁵Tatentili nopa cuataminti cati tijhuica, huan quinajsis iniyoltipa mocualancaitacahua quema tiquinmelaitas, huan tiquinmajcahuilis. Ma huetzica moicxita nochi ten campa hueli talme campa quintepanitaj teteyome.

⁶Toteco Dios, titanahuatis para nochipa huan amo quema tamis. Quena, motanahuatilis elis senquisa xitahuac.

⁷Tiquicnelía cati melahuac huan tijcualancaita cati amo cuali. Yeca Toteco Dios, yaya cati moTeco mitztequitalijtoc titanahuatijquet, huan mitzmacatoc más paquilisti huan más tatepanitacayot, que nochi sequinoc tanahuatiani.

⁸Nochi moyoyo mijyotía ica nopa taajhuiyacayot mirra, áloe huan canela. Huan mitzpaquilismacaj ica tatzotzonali nepa ipan mochaj campa quiyejyectalijtoque nochi tapepecholi ica tamanti cati tahuel cuajcualtzitzi huan pajpatiyo.

⁹Iniichpocahua sequinoc tanahuatiani quipiyaj nopa hueyi tatepanitacayot para mitztequipanose. Huan ica monejmat mosehuijtoc nopa ichpoca tanahuatijquet cati elis mosihua cati quiyectalijtoque ica oro cati onca ipan tali Ofir.

¹⁰Xijtacaquili ichpocat. Quena, xijtacaquili cuali, nocone, cati nimitzilhuis: Ayecmo xiquintoquili motatahua, moicnihua huan nochi cati timomajtoya tijchihua.

¹¹Nopa tanahuatijquet tahuel mitznequi, huan nelía paqui ica moyejyejca. Huajca monequi tijneltocas pampa ama ya moTeco.

¹²Hualase mitzpaxaloquij iichpocahua nopa tanahuatijquet ten altepet Tiro. Quena, cati más tominpixtoque ipan nopa altepet hualase huan mitztamajmacaquij. Ya ni quichihuase pampa quinequise ximohuampojchihua inihuaya.

¹³Nopa ichpoca monamictijquet mocualtalía ipan ichaj ica tamanti cati más cuajcualtzi. Yaya iichpoca se tanahuatijquet huan ama mocuilis ne tanahuatijquet cati hueyi. Tahuel cuajcualtzi nopa ichpocat ica iyoyo cati nelcuajcualtzi cati tajtzonti ica oro.

¹⁴Quena, cuajcualtzi quiyoyontijtoque ica iyoyo tajtzonti huan ama quihuicase iixpa nopa tanahuatijquet cati ihuaya monamictis. Itepotzco yase iichpocapoyohua cati quinnotztoc.

¹⁵Ica hueyi paquilisti calactiyahuij ipan nopa hueyi cali campa ichaj nopa tanahuatijquet.

¹⁶Tanahuatijquet, se tonali tiquinpiyas moconehua, huan tiquinmacas tequiticayot para tanahuatise quej mohuejcapan tatahua mitzmacaque. Quena, teipa tiquinpiyas motelpocahua cati mitzpalehuise. Huan tijchihuas ma tanahuatica hasta campa hueli techaj ipan nochi motal.