Salmos 45:4-17

⁴Lu xel-la' szren chiu' chepe bánquezu'. Bchine dizra' li, ne xel-la' dxexruj lazre', ne da xrlátaje, na' guzéajni'i Cuinu' da zri'a ca'.

⁵Zaj nalále̱'e̱ xaga nalá xéche'ze chiu' ca', da xelute na benne' xe̱zr la xu ca' lau Lue', ne cheajlechaze na lu lázrdau benne' ca' dxeledábague̱' Lue'.

⁶Lataj blau naga dxe'u, Dios, naca na da chadía chacanna, ne súatequeze na. ¡Xrlátaje naca ca dxenná be'u!

⁷Nazri'inu' da naca xrlátaje, ne dxecuídenu' da cale̱la. Chee̱ le̱ na' ba nuzúa Dios chiu' Lue' xlátaju', naga dxebéle̱'e̱dxenu' ca le sa' ljwezru' ca'.

⁸Dxelá zixre zra lanu' nen xala da naca na nizre xaga, ne xiaj, da ca' dxelelá na zixre. Lu xu'u lizru' da zácale̱'e̱ na dxuluzúe̱' Lue' lu da ba neza.

⁹Bi nu'ula chee̱ wenná bea ca' zaj zúabe' ládujla nu'ula chiu' ca' zaj naque̱' blaudxa. Chalá'a xabe̱la chiu' dxe' nu'ula gácabe' zru'ulu' nácube' oro da za na xe̱zre Ofir.

¹⁰Bene, nú'uladau', ne gunná' xque, ne bze̱ naga da nnia': Bzala lazru' lazriu' ne lizre xrau',

¹¹na' benne' wenná bea sa lazre̱' xel-la' xrtan chiu'. Bzexruj lazru' lau le̱' lawe' da naca le̱' xranu'.

¹²Xelelá' nu'ula xe̱zre Tiro lau lue', zaj nu'e̱ da xelunne̱' chiu', na' xelenaba benne' gunní'a ca' gunu' tu culuén chee̱'.

¹³Xrtanle̱'e̱ naca bi nu'ula chee̱ wenná bea lu xu'u naga zue̱'. Zra lánabe' nazí' lechítaje̱ na oro.

¹⁴Xeleché̱'e̱-be' lau wenná bea, nácube' zra lánabe' da núale̱'e̱ lechítaje̱ na. Nu'ula wégu'du ca' chjácabe' cuzru le̱be'. Nu'ula caní, nu'ula ljwézrebe' xuluzúabe' lawe' lue'.

¹⁵Lu dute̱ xel-la' dxebé, ne lu da ba neza xeleché̱'e̱-be', na' xelú'ube' lu xu'u lizru', wenná bea.

¹⁶Waláz chee̱ xra xrna'u xelexezúa zri'inu', bi ca' gunu' xelenná beabe' du gabí'i xe̱zr la xu.

¹⁷Guna' cheajlesá lazre' xúgute̱ bénneache lau' lue'. Chee̱ le̱ na' xelúe lá'ana bénneache lue' chadía chacanna, ne gaxuane iza.