SALMOS 45:4-13

⁴Xicahuajtlejco huan xitlatlaniti ica nochi mohueyitilis. Ta tiquinmanahuía tlen teicneltzitzi huan tlen quichihuaj tlen melahuac. Titetlajtolsencahua xitlahuac. Nelía huejhueyi tlamantli tijchihua.

⁵Tlatentili nopa cuatlamintli tlen tijhuica, huan quinajsis ininyoltipa mocualancaitacahua quema tiquinmelactlachilis, huan tiquinmajcahuilis. Ma huetzica moicxitla nochi tlacame tlen campa hueli tlaltini campa quintlepanitaj teteyome.

⁶Toteco Dios, titlanahuatis para nochipa huan ax quema tlamis. Quena, motlanahuatilis elis senquistoc xitlahuac.

⁷Tiquicnelía tlen melahuac huan tijcocolía tlen ax cuali. Yeca Toteco Dios, yajaya tlen moTeco mitztequitlalijtoc titlanahuajtijquetl, huan mitzmacatoc más paquilistli huan más tlatlepanitacayotl, que nochi sequinoc tlanahuatiani.

⁸Nochi moyoyo mijyotía ica nopa tlaajhuiyacayotl mirra, áloe huan canela. Huan mitzpaquilismacaj ica tlatzotzonali nepa ipan mochaj campa quiyejyectlalijtoque nochi tlapepecholi ica tlamantli tlen tlahuel yejyectzitzi huan pajpatiyo.

⁹Iniichpocahua sequinoc tlanahuatiani quipiyaj nopa hueyi tlatlepanitacayotl para mitztequipanose. Huan ica monejmatl mosehuijtoc nopa ichpoca tlanahuatijquetl tlen elis mosihua tlen quiyejyectlalijtoque ica oro tlen onca tlali Ofir.

¹⁰Xijtlacaquili ichpocatl. Quena, xijtlacaquili cuali, nocone, tlen nimitzilhuis: Ayoc xiquintoquili motatahua, moicnihua huan nochi tlen timomajtoya tijchihua.

¹¹Nopa tlanahuatijquetl tlahuel mitzcualita, huan nelía paqui ica moyejyejca. Huajca monequi tijneltoquilis pampa ama ya moTeco.

¹²Hualase mitzpaxaloquij iichpocahua nopa tlanahuatijquetl tlen altepetl Tiro. Quena, tlen más tominpixtoque ipan nopa altepetl hualase huan mitzmacase regalos. Ya ni quichihuase pampa quinequise ximohuampochihua ininhuaya.

¹³Nopa ichpoca monamictijquetl mocualtlalía ipan ichaj ica tlen más yejyectzi. Yajaya iichpoca se tlanahuatijquetl huan ama mocuilis ne tlanahuatijquetl tlen hueyi. Onpano yejyectzi nopa ichpocatl ica iyoyo tlen nelcuajcualtzi tlen tlajtzontli ica oro.