SALMOS 44:9-25

⁹Pero amantzi eltoc quej techtahuelcajtoc huan techpinahualtijtoc. Yon ayecmo tinemi inihuaya tosoldados quema tiontatehuíaj.

¹⁰Tijchijqui ma ticholoca iniixpa tocualancaitacahua. Quena, inijuanti cati techcualancaitaj techtachtequilíaj huan quihuicaj nochi cati quinequij.

¹¹Techtemactilijtoc quej tipilborregojtzitzi cati san quichiyaj para quinhuicase campa quinmictise. Huan techsemantoc campa hueli ipan sequinoc talme campa quinhueyichihuaj teteyome.

¹²Technamacatoc timomasehualhua ica nelquentzi quej elisquía amo teno topati.

¹³Nochi masehualme ipan nopa talme cati itztoque tonechca quiitaque cati techchihuilijtoc. Yeca techtaijilhuíaj huan toca paquij.

¹⁴Tijchijtoc para inijuanti cati quinhueyichihuaj taixcopincayome ma toca huetzcaca. Nochi quema techitaj, motzonojoliníaj.

¹⁵Mojmosta toixpa eltoc nopa pinahualisti hasta tijnequisquíaj timoixtzacuase,

¹⁶pampa techtaijilhuíaj huan techhuetzquilíaj nopa motacuepilijca masehualme. Quena, techpinahualtíaj tocualancaitacahua.

¹⁷Nochi ni tamanti topantitoc, masque amo timitzelcajtoque, yon amo timoiyocacajtoque ten nopa camanal sencahuali cati tijchijqui inihuaya tohuejcapan tatahua.

¹⁸Amo timoiyocatalijtoque ten ta, yon amo tijcajtejtoque moojhui.

¹⁹Pero techtahuelcajtoc campa amo aqui itztoc, campa san itztoque tapiyalme cati mosisiníaj. Techcajtoc ipan se tzintayohuilot cati eltoc quej miquilisti.

²⁰Toteco Dios, sinta timitzelcajtosquíaj, o tijhueyichijtosquíaj se totaixcopincayo,

²¹ta tijmajtosquía, pampa ta tijmati nochi cati ixtacatzi eltoc ipan iyolo se masehuali. Pero amo tijchijtoque, Toteco.

²²Pero masque amo teno tijchijtoque, por ta tiitztoque nechca miquilisti. Techchihuaj quej tipilborregojtzitzi cati san quichiyaj ajquiya quinmictis pampa timoaxcahua.

²³¡Toteco ximotanana! ¡Amo xicochi! Amo ximoiyocatali ten tojuanti para nochipa.

²⁴¿Para ten timoixtatía? Eltoc quej tiquelcajtoc para tojuanti titaijyohuíaj huan miyac techcualancaitaj.

²⁵Techtahuisojtoque hasta talchi. Toxayac eltoc ipan taltepocti huan amo hueli timotananase.