SALMOS 44:8-14

⁸Mojmostla timitzpaquilismacase Toteco Dios. Huan timitzhueyichihuase ica huicatl para nochipa.

⁹Pero amantzi eltoc queja titechtlahuelcajtoc huan titechpinahualtijtoc. Niyon ayoc tinemi ininhuaya tosoldados quema tiontlatehuíaj.

¹⁰Tijchijqui ma ticholoca iniixpa tocualancaitacahua. Quena, inijuanti tlen techcocolíaj techtlaxtequilíaj huan quihuicaj nochi tlen quinequij.

¹¹Titechtemactilijtoc queja tipilborregojtzitzi tlen san quichiyaj para quinhuicase campa quinmictise. Huan titechsemantoc campa hueli ipan sequinoc tlaltini campa quinhueyichihuaj teteyome.

¹²Titechnamacatoc timotlacajhua ica nelquentzi queja ax tleno topati elisquía.

¹³Nochi tlacame ipan nopa tlaltini tlen itztoque tonechca quiitaque tlen titechchihuilijtoc. Yeca techtlaijilhuíaj huan toca paquij.

¹⁴Tijchijtoc para inijuanti tlen quinhueyichihuaj tlaixcopincayome ma toca huetzcaca. Nochi quema techitaj, motzonhuihuixohuaj.