SALMOS 44:4-22

⁴Ta tinotlanahuatijca huan tinoTeco Dios. Ta tiquinmanahuía huan tijchihua ma tlatlanica momasehualhua.

⁵Quena, ica motlapalehuil tiquintlanise tocualancaitacahua. Huan ica mochicahualis ininpan timoquejquetzase catli techhuilanaj.

⁶Pampa amo timotemachíaj ipan tocuahuitol huan tomachete para ma techmanahuica huan titlatlanise.

⁷Eltoc ta, Toteco, catli tijchihua ma tiquintlanica tocualancaitacahua. Ta tiquinpinahualtijtoc nochi catli techcualancaitaj.

⁸Mojmostla timitzpaquilismacase tinoTeco Dios. Huan timitzhueyichihuase ica huicatl para nochipa.

⁹Pero amantzi eltoc quen techtlahuelcajtoc huan techpinahualtijtoc. Niyon ayacmo tinemi ininhuaya tosoldados quema tiontlahuilanaj.

¹⁰Tijchijqui ma ticholoca iniixpa tocualancaitacahua. Quena, inijuanti catli techcualancaitaj techtlachtequilíaj huan quihuicaj nochi catli quinequij.

¹¹Techtemactilijtoc quen tipilborregojtzitzi catli san quichiyaj para quinhuicase campa quinmictise. Huan techsemantoc campa hueli ipan sequinoc tlalme campa quinhueyichihuaj teteyome.

¹²Technemacatoc timomasehualhua ica nelquentzi quen amo tleno topati elisquía.

¹³Nochi masehualme ipan nopa tlalme catli itztoque tonechca quiitaque catli techchihuilijtoc. Yeca techtlaijilhuíaj huan toca paquij.

¹⁴Tijchijtoc para inijuanti catli quinhueyichihuaj tlaixcopincayome ma toca huetzcaca. Nochi quema techitaj, motzonojoliníaj.

¹⁵Mojmostla toixpa eltoc nopa pinahualistli hasta tijnequisquíaj timoixtzacuase,

¹⁶pampa techtlaijilhuíaj huan techhuetzquilíaj nopa motlacuepilijca masehualme. Quena, techpinahualtíaj tocualancaitacahua.

¹⁷Nochi ni tlamantli topantitoc, masque amo timitzelcajtoque, niyon amo timoiyocacajtoque tlen nopa camanal sencahuali catli tijchijqui ininhuaya tohuejcapan tatahua.

¹⁸Amo timoiyocatlalijtoque tlen ta, niyon amo tijcajtejtoque moojhui.

¹⁹Pero techtlahuelcajtoc campa amo aqui itztoc, campa san itztoque tlapiyalme catli mosisiníaj. Techcajtoc ipan se tzintlayohuilotl catli eltoc quen miquilistli.

²⁰Toteco Dios, sintla timitzelcajtosquíaj, o tijhueyichijtosquíaj se totlaixcopincayo,

²¹ta tijmajtosquía, pampa ta tijmati nochi catli ichtacatzi eltoc ipan yolojtli. Pero amo tijchijtoque, Toteco.

²²Pero masque amo tleno tijchijtoque, por ta tiitztoque nechca miquilistli. Techchihuaj quen tipilborregojtzitzi catli san quichiyaj ajqueya quinmictis pampa timoaxcahua.