SALMOS 44:3-10

³Tohuejcapan tatahua amo quitanque nopa tali ica inimacheta, yon ica ininchicahualis. Tatanque ica nopa hueyi chicahualisti cati ta tijpiya ipan monejmat, huan pampa hueyi moyolo ica inijuanti, huan achi más tiquinicnelía.

⁴Ta tinotanahuatijca huan tinoTeco Dios. Ta tiquinmanahuía huan tijchihua ma tatanica momasehualhua.

⁵Quena, ica motapalehuil tiquintanise tocualancaitacahua. Huan ica mochicahualis ininpan timoquejquetzase cati techtehuíaj.

⁶Pampa amo timotemachíaj ipan tocuahuitol huan tomacheta para techmanahuise huan titatanise.

⁷Eltoc ta, Toteco, cati tijchihua ma tiquintanica tocualancaitacahua. Ta tiquinpinahualtijtoc nochi cati techcualancaitaj.

⁸Mojmosta timitzpaquilismacase tinoTeco Dios. Huan timitzhueyichihuase ica huicat para nochipa.

⁹Pero amantzi eltoc quej techtahuelcajtoc huan techpinahualtijtoc. Yon ayecmo tinemi inihuaya tosoldados quema tiontatehuíaj.

¹⁰Tijchijqui ma ticholoca iniixpa tocualancaitacahua. Quena, inijuanti cati techcualancaitaj techtachtequilíaj huan quihuicaj nochi cati quinequij.