SALMOS 44:2-4

²Quena, Toteco Dios, ica mohueyi chicahualis ta tiquinquixti nopa fiero masehualme cati quinhueyichihuayayaj teteyome ipan nopa tali, huan nopa tali tiquinmacac totatahua. Quena, tiquintatzacuilti ne sequinoc huan tiquinpalehui tohuejcapan tatahua para ma momiyaquilica, huan ma moaxcatica.

³Tohuejcapan tatahua amo quitanque nopa tali ica inimacheta, yon ica ininchicahualis. Tatanque ica nopa hueyi chicahualisti cati ta tijpiya ipan monejmat, huan pampa hueyi moyolo ica inijuanti, huan achi más tiquinicnelía.

⁴Ta tinotanahuatijca huan tinoTeco Dios. Ta tiquinmanahuía huan tijchihua ma tatanica momasehualhua.