SALMOS 44:19-24

¹⁹Pero titechtlahuelcajtoc campa axaca itztoc, campa san itztoque tlapiyalime tlen mosisiníaj. Titechcajtoc ipan se tzintlayohuilotl tlen eltoc queja miquistli.

²⁰Toteco Dios, intla timitzilcajtosquíaj, o tijhueyichijtosquíaj se totlaixcopincayo,

²¹ta tijmajtosquía, pampa ta tijmati nochi tlen ixtacatzi eltoc ipan toyolo. Pero ax tijchijtoque, Toteco.

²²Pero yonque ax tleno tijchijtoque, mopampa ta tiitztoque nechca miquistli. Titechchihuilíaj queja tipilborregojtzitzi tlen san quichiyaj ajqueya quinmictis pampa timoaxcahua.

²³¡Toteco ximotlalana! ¡Amo xicochi! Amo ximoiyocatlali tlen tojuanti para nochipa.

²⁴¿Para tlen timoixtlatía? Eltoc queja tiquilcajtoc para tojuanti titlaijiyohuíaj huan miyac techcocolíaj.