SALMOS 44:1-26

¹Dios, x̱a x̱na' gole cheto' ka' bzéngekle' neto' da' beno' ḻo ža chégake', dan' beno' yiz wdé ka'.

²Bchinnjo' yezika' yež ka' ḻawgak x̱a x̱na' gole cheto' ka', na' bnnito'o ḻégake' ḻo latje chegak benách ca'. Bsáka'ḻi'o benne' yež ka', san bzoa chocho' benne' chio' ka' ḻo yežlyó gan zoato' neto' na'a.

³X̱a x̱na' gole cheto' ka' bi wẕí'gake' yežlyó nga ḻen ya ntoche' chégakkze' ka'. Bi beslá kwíngake' ḻen yeḻa' waḻe da' zej nape', san Le' besló' ḻégake' ḻen yeḻa' wak chio', na' ḻen yeḻa' waḻe chio', na' ḻen yeḻa' ẕen chio', dan' wyáz ḻažo'o ḻégake'.

⁴Le', Dios, nako' Benne' Wnná Bia' chia'. Beslá neto', ẕa'só Jakob.

⁵Ḻen yeḻa' wak chio' Le' wzéx̱jwto' benne' ka' ẕdíḻ-ḻengake' neto'. Ni'a chio' Le' ẕzéx̱jwto' ḻégake'.

⁶Bi wx̱én ḻaža'a yag ntoche' chia', dan' bi yeslán neda'.

⁷Le' wdape chi'o neto' nich bi be gok gongak cheto' benne' ka' bi ẕḻé'egekle' neto' chawe'. Beno' ga bedoé'egekle benne' ka' ẕžá'agake' neto'.

⁸Ni'a chio' Le', Dios, sóatezto' ḻo yeḻa' ba nez, na' to chi'ize wx̱én ḻáže'to' Le',

⁹san wléj yichjo' neto', na' beno' ga žedoe'elto', na' bi žéjḻeno' benne' cheto' ka', benne' žjake' ḻo wdiḻe.

¹⁰Beno' ga bẕonnjto' ḻawgak benne' ka' ẕdíḻ-ḻengake' neto', na' benne' ka' ẕží'igake' cheto' beká'agake' yógo'te da' wdapto'.

¹¹Bdio' neto' ka ẕila' ka' ḻo na'gak benne' ka' žótgake' neto', na' besḻaso' neto' ladjw benne' zi'to' ka'.

¹²Bdezo' neto', benne' chio' ka', ḻo ná'gake', na' bi be bezi'o.

¹³Beno' ga benne' yež gawze ka' ẕnnégake' cheto'. Benne' zej nyechjle' neto' ẕká'ngake' neto' ka'ze, na' žẕížegake' cheto'.

¹⁴Bzo' neto' ka to da' ẕnnagak benne' wláž cheto' ka' naken to da' nyáche'ḻe'e. Kate' ẕḻé'egekle benne' ka' neto', ẕta yíchjgake', na' žebángekle' ka žak nyache' ḻáže'to'.

¹⁵Tža tža žedoé'etezla', na' žé'teza' ḻo da' zedḻe'e.

¹⁶Ẕnnégake' chia', na' ẕzóagake' neda' cheḻa'ale. Benne' ka' bi ẕḻé'egekle' neda' chawe' ẕži'igake' chia', na' žóngake' neda' ẕia.

¹⁷Yógo'te da' ki žákgaken cheto', san bi na' gaḻ ḻáže'to' Le'. Bi na' wzoato' cheḻa'ale x̱tižo'o dan' bénḻeno' neto'.

¹⁸Bi na' wsán ḻáže'to' Le', na' bi na' wzoato' cheḻa'ale da' bchi'lo' neto'.

¹⁹¿Biẕ chen' bzo' neto' cheḻa'ale lo latj chegak bia snia ka', na' bzo' neto' gan za' gatto'?

²⁰Chela' goḻ ḻáže'to' Dios cheto', o chela' bka'n ẕento' lo'a ka',

²¹¿bi žaḻa' ža'a Dios neto' ni'a che da' ki? Ḻe' nnézkzele' da' yo'o ḻo yichj ḻáẕdo'gak benne' ka'.

²²Dan' nakto' chio', tža tža zóagake' gótgake' neto'. Béngake' neto' ka ẕila' za' gótgake'-ba'.

²³¡Bebán, X̱anto' Dios! ¿Biẕ chen' ẕtaso'? ¡Bebán! ¡Bi so' zi'to' to chi'ize!

²⁴¿Biẕ chen' bkache' kwino', na' bi žákbe'elo' kan ẕzáka'ḻe'eto', na' kan ẕkóngekle benne' ka' neto' žin?

²⁵Ba nat ni'a na' be' da' nakkzto', dan' bzéx̱jwgake' neto', na' žx̱óbgake' neto' ḻo yo.

²⁶¡Wzó ža'! ¡Gokḻen neto'! ¡Ḻo yeḻa' žeyache' ḻaže' chio', beslá neto'!