Salmos 44:1-25

¹Corëpita mirajcuna isquirbishan alabansa. Tayta Dios, quiquëcunami wiyarä. Papänëcunapis willapämaran paycuna caycashan wichan rurashayquicunata, päsaj watacunacho rurashayquita.

²Quiquiquimi mana rispitashojcunatapis jitarirayqui. Jäpa runacunata illgächirayqui. Chaymannami awilöcunata tiyachirayqui.

³Manami sablinwanchu cay pachataga guechuran. Ni callpanwanpischu binsiran. Chaypa ruquenga gammi munayniquiwan binsirayqui. Alli car yanapaptiquimi binsiran. Unay caj castäcunata cuyashpayquimi munayniquiwan yanaparayqui.

⁴Raynillä, Tayta Diosnillä, acrashayqui runacunataga gammi yanaparayqui binsinanpaj.

⁵Yanapämaptiquimi binsishcä chiquimajcunata. Magamajcunatapis illgächirä.

⁶Binsinäpäga noga manami yäracömanchu lëchäman. Sablëpis manami salbamanmanchu.

⁷Gam yanapämaptiquimi conträcunata binsishcä. Gammi pengayman churashcanqui chiquimajcunataga.

⁸Imaypis gamtaga alabaycäshayquimi Tayta Dios. Imaypis agradësicuycäshayquimi. Selah

⁹Canan ichanga ñïgamashcanquina. Pengaychönami cachaycamashcanqui. Suldäröcunatapis manami yanapanquinachu.

¹⁰Chiquimajcunata manchacunäpänami camacächishcanqui. Chiquimajcunaga ima-aycäcunatapis guechumanmi. Munashan cajtami apacun.

¹¹Nogacunataga gastupaj caj uyshano canäpänami cachaycamashcanqui. Machiypa machir gargaramashcanqui mana rispitashoj runacunaman.

¹²Acrashayqui runacunataga barätullami ranticuycushcanqui. Manami gänashcanquipischu.

¹³Pï-maypis ashllimänanpämi cachaycamashcanqui. Bisïnöcunami achäquita ashipämashpan pengacachiman.

¹⁴Mana rispitashojcuna asipämänanpämi camacächishcanqui. Nogacunataga umantapis jajtachir-rämi ricapäman.

¹⁵Imay örapis pengacachimanmi. Pengacachimaptinmi cäräpis pucayaypa pucayanraj.

¹⁶Chayno caycä chiquimajcuna ayñita cutichimayta munaptin, achäquita ashipämar ashllimaptinmi.

¹⁷Llapan chaycuna nogacunata chayamasha captinpis manami gamtaga gongaycushayquichu; parlacushanchïtapis manami gongaycushächu.

¹⁸Gamta gongaytaga manami yarpashcächu. Yachachimashayquitapis manami cachaycushcäcunachu.

¹⁹Chaypis gamga ñacachimashpayquimi imapis mana cashanman gargamashcanqui. Fiyupa yanauyaycaj chacaymanmi cachaycamashcanqui.

²⁰Tayta Dios, gamta gongaycushpä juc-lä nasyuncunapa diosninta adurasha captë

²¹gamga musyanquimanmi caran llapan pacarajtapis ricaj caycashpayquega.

²²Gamman yäracamuptëmi imay örapis wañuchiyta munarcaycäman. Pishtananpaj caycaj uyshatanömi nogacunataga ricaycäman.

²³Tayta Dios, ¿imanirtaj puñucunqui? ¡Ricchayna ari! ¡Ricchayna! Para-simriga ama witicuychu ari.

²⁴¿Imanirtaj pacacunqui? ¿Imanirtaj nogacunataga gongaycamashcanqui? Masqui ricay, imanöshi ñacaycächiman.

²⁵Nogacunataga binsimashanami. Chaymi pengacuyllawan lätaycachaycä.