Salmos 44:1-25

¹Coré-wagan namakmalad-e-iduedga we-namaked-Masquilʼye-nugad narmaksad. Bab-Dummad, epenne ibmar-dakledisurmalad be imaksadi, anmar-sunnagwad uayagwar itosad. Epenne-ibmar-gusadi, anmar-dadgan anmarga sogsad.

²Be-sunnagwadi, dule-be-wissurmalad be onisad. A-muchubbi, anmar-dadgan be urbisad. Dule-be-wissurmaladi be sabsur-odurdaksad, anmar-dadgandi nasgumai be imaksad.

³Dadgan gwen e-es-suidgine yar sussurmalad, gwen e-surgangine dulemargi obichasurmalad. Unnila be-ganguedgi, be-surgangi, be anmar-dadgan-bendaksad. Eba-be-gudigusadgi be amar-bendaksad. Ar bede, dadgan-nue-sabedbali, deyob imaksad.

⁴Bebi unnila be an-Bab-Dummadid, bebi be, an-reyd. ¡Be-igar-ukedba dulemargi-nakwega be anmar-imaksad!

⁵Be-ganguedgi anmar-isdarmaladgi anmar nakwisad. Be-nuggi anmargi-gwichigudimaladi anmar obelosad.

⁶An-warsigi bendakleged an amiosulid, an-es-suid dulemargi-nakwega gwen an-imakosulid.

⁷Be anmar-isdarmaladgi-nakwega be anmar-imaksad. Bebi, dule-anmargi-gwisgudimalad-obingegsaega be imaksad.

⁸¡Bab-Dummad, anmar beginbi nug-dummarba-itodii gumaloed! ¡Anmar be-nug-odummodii gumaloed!

⁹Emisgindi, be anmar-obachad, be anmar-obinge-imaksad. Bar be anmar-sorda-bila-onomaladba nanasurgusad.

¹⁰Dule-isdarmalad-abin sikirmakega be anmar-imaksad. Dule-sae-anmar-dakdimalad, anmar-ibe ibmar-atur-imaksamalad.

¹¹Sibad-wawaadyob be anmar-oburgwega anmar-urmaksad. Dulamar-bamalad-imbagi be anmar-oaisakisad.

¹²Be-dulamar mani-bipii be uksad, egi be ibmar-nued gwen-amissulid.

¹³Dule-anmar-neg-dikarba-mamaid-abin, dule-gegegwaga be anmar-imaksad. Dulemarga anmar dodogedga guded, dulemarga anmar alledga guded.

¹⁴Neggweburmar-oallega be anmar-imaksad. Anmar-dakalir, yamo-yamo anmarga guardamalad.

¹⁵Bane-bane bingedar an itodigussunnad. An akusunna-itogedba bingeguarsunnad.

¹⁶An-isdarmalad-buged-an-imakbi-gudimaladse, an-isdarmalad-sae-an-dakdimaladse, an-isdarmalad-an-dikarba-urwedimaladse, an bingedar-itoged.

¹⁷Bela we-ibmar anmargi gusad. Degi-inigwele, anmar be-iessulid. Dadgan-Ebo-Be-Igar-Mesisadi anmar gwen-bichissulid.

¹⁸Anmar bega uayasuli gussulid, be-Igargi anmar gwen bangussurbalid.

¹⁹Ar bedi achusapur-bunnu-wawaad-e-gubya-yaba be an-balimetemalad, negasichidbi be anmar-idu nasiksad.

²⁰Bab-Dummad, ar anmar be-iesana, be-muchub anmar bab-dummad-baidse gochana,

²¹¿ar be wisguosulin be insae? Ar bede bela ulubgi dulemar-binsaed mag-daked.

²²Be-ular, anmar bane-bane oburgwilediid. Sibad-wawaad-oburgwelegedyob anmar imaklediid.

²³¡Bab-Dummad, atake! ¡Mer gabe! ¡Gwisgue! Mer be anmargi bangudii gue.

²⁴¿Ibiga be anmar-idu dukue? ¿Ibiga be anmar-wilediid be iege? ¿Ibiga be anmar-sabsur-imaklediid be iege?

²⁵Anmar napa-nukuse yasulemamaigus-naed. Napayala baparmakdigusmalad.