SALMOS 40:7-17

⁷Yeca nimitzilhuijtoc: “Nica niitztoc. Ya nihuala quej ijcuilijtoc ipan mocamanal para nijchihuasquía.

⁸¡NoTeco Dios! Nechpactía nijchihuas mopaquilis, huan motamachtil nijhuica ipan noyolo.”

⁹Miyacapa iniixpa momasehualhua niteyolmelajtoc para ta, TOTECO, tiquinchihua masehualme xitahuaque moixpa. Cuali tijmati para amo san nicajoctoc cati nijmati.

¹⁰Amo nijtatijtoc nopa cuali camanali ipan noyolo para amo aqui niquilhuis. Nochi masehualme niquinyolmelahua para ta tiquinmaquixtis. Nochipa nitematiltis para ta nelía titemachti huan titepalehuía. Nepa miyacapa nitepohuilis para titetasojta huan amo timoyolpata.

¹¹TOTECO, nijmati amo quema tijcahuas techtasojtas. Nimochiya ipan moteicnelijcayo, pampa ta nochipa techmocuitahuis.

¹²Miyac tequipacholi nijpiya campa hueli. Amo hueli nijpohua nochi. Notajtacolhua nechtantoc huan nichoca hasta amo hueli nitachiya. Notajtacolhua nelmiyac hasta quipano imiyaca notzoncal. Tantinemi noyolo huan nochicahualis.

¹³TOTECO, techmanahuiqui. Quena TOTECO, ximoisihuilti huan techpalehuiqui.

¹⁴Ma mopinahualtica huan ma mocuapoloca cati quinequij nechtzontamiltise. Xiquinquixti cati nechcualancaitaj huan tahuel xiquinpinahualti.

¹⁵Nochi cati noca paquij ma huetzica. Xiquincuepa san ica inimax.

¹⁶Pero ma paquica miyac nochi cati mitztemohuaj. Quena, paquij cati mitzicnelíaj pampa tiquinmaquixtijtoc. Nochipa quiijtohuaj: “Nelía hueyi TOTECO.”

¹⁷Masque nimotequipachojtoc huan nechpolohua ten ica nipanos, nijmati para ta TOTECO techelnamiqui. Ta tinoTeco Dios, techpalehuis huan techmanahuis. NoTeco Dios, amo xihuejcahua quema nimitznotza. Nimantzi techpalehuiqui.