SALMOS 40:1-16

¹Ḻo yeḻa' ẕen ḻaže' chia' wleza' X̱ana' Dios, na' bze nage' chia', na' benle' da' wnnabla' Ḻe'.

²Bebeje' neda' ka to ḻo yežw gže', na' ḻo da' nak ka gona'. Bzoe' ni'a to ḻo yej x̱e, na' begoé'e neda' nez chawe'.

³Bene' ga žoḻa' to da' kob da' ẕka'n ẕenen X̱anžon'. Benne' zante ḻé'egekle' da' ni da' bene' Ḻe', na' žébegake' Ḻe', na' wx̱én ḻáže'gake' X̱anžo Dios.

⁴Ba nez ẕen naken che bennen' žx̱en ḻaže'e X̱anžo Dios, na' bi žónḻene' tẕen benne' ka' ẕží'igake' che Dios, na' kege ḻen benne' ka' ẕka'n ẕéngake' lo'a ka'.

⁵Da' ẕenḻe'e beno', X̱ana' Dios, na' žebanlto', na' ka zej nak da' žak ḻažo'o Le' gono' cheto', bi gak wlabto' ḻawo' Le'. Cha' wzenla' no benne' ka zej naken, na' cha' wchaḻja' chégaken, bi gak wlaba' ḻégaken.

⁶Bi chaz ḻažo'o biado' ka' gota' ḻawo' Le', cha' to da' gonna' chio'. Bi ẕnnabo' biado' ka' wzeya' ḻawo' Le', na' žen chegak biado' ka' da' ko'an ḻawo' Le' ni'a che doḻa' chia', san bsaljo' naga' nich yenla' chi'o.

⁷Naž wnnía': “Bwia nga, za'a neda'. Nyejw ḻe'e yiche la'y ka nak chia'.

⁸Žaz ḻaža'a gona' da' žak ḻažo'o Le', Dios chia', na' da' wnnakzo' Le' yo'on ḻo yichj ḻáẕda'wa'.”

⁹Ba bzenla' benne' ka' da' chawe' da' nako' gan zej ndobe benne' zante ka' ḻawo' Le'. Bwia nga, bi wzóa' žize, na' nnézkzelon' Le', X̱ana' Dios.

¹⁰Bi bkáche'za' da' chawe' da' nako' ḻo ḻáẕda'wa', san bchaḻjkza' ka nak yeḻa' ḻi ḻaže' chio', na' kan žesló' benne' ka'. Bi wzóa' žize ka nak yeḻa' žeyache' ḻaže' chio', na' ka nak da' naken dot da' li chio' ladjw benne' zante zej ndobe' chio' Le'.

¹¹X̱ana' Dios, bi želo' yeyache' ḻáže'lo' neda'. Yeḻa' žeyache' ḻaže' chio', na' da' likze chio' žákḻentezegaken neda'.

¹²Nyéchjgekle da' bi nak chawe' ka' neda', na' da' bi nak chawe' ka' da' bena' zej žian neda'. Che ḻen bi gak chis ḻawa' ḻawo' Le'. Zej nyanžen ka zej nak yicha' yichja' na' žedó ḻaža'a.

¹³Ẕnnabla' Le', X̱ana' Dios, yesló' neda'. X̱ana' Dios, ben byene gákḻeno' neda'.

¹⁴Ben ga yedoé'egekle, na' chíx̱gekle benne' ka' žénegekle' gótgake' neda'. Ben ga wẕonnjgak, na' yedoé'egekle benne' ka' žak ḻáže'gake' góngake' neda' ẕia.

¹⁵Ben ga chíx̱gekle, na' wẕonnjgak benne' ka' ben dítjgekle' neda'.

¹⁶Ben ga yebégekle, na' soagak ḻo yeḻa' ba nez benne' ka' žx̱en ḻáže'gake' Le', na' nnégakkze benne' ka' zej nži'ile' Le', Benne' Weslá chégake'. Nnágake': “¡Ga'n ẕen X̱anžon'!”