SALMOS 39:3-11

³Hasta nijmatiyaya quej noyolo tatayaya. Huan quema san ya nopa nimosenilhuijtoya, nijmatiyaya quej se tit lemeniyaya ipan noyolo. Huajca ayecmo niquijyohui huan nicamanaltic chicahuac, huan niquilhui TOTECO:

⁴“TOTECO, technextili quesqui tonali niitztos huan quema nimiquis. Nijmati nelquentzi tonali niyoltos nica.

⁵Techmacatoc se nemilisti cati nelquentzi xihuit. Huan nochi xihuit cati niyoltos elis san se talojtzi moixpa, pampa ta nochipa tiitztoc. Nochi masehualme polijtehuaj nimantzi san quej ixpolihui iniijyoyo quema taijyotilanaj.

⁶Nochi masehualme panotehuaj quej se ecahuili. San tapic nochi inintequi. Masque quimiyaquilíaj tamanti cati ipati, amo quimatij ajquiya iaxca elis teipa.

⁷Huajca, noTeco, amo teno onca cati ipan huelis nimotemachis. Nimochiyas san ipan ta.

⁸Techmaquixti ten notajtacolhua. Amo xiquincahuili masehualme cati huihuitique ma noca paquica ica cati nijchijtoc.

⁹Nimocamatzacuas moixpa huan ayecmo nimolinis por cati nopanti, pampa ta techtatzacuiltía.

¹⁰Pero noTeco, ayecmo techtatzacuilti. Nijmati nimiquis pampa techtejtzontoc ica momax.

¹¹Quema se masehuali tajtacolchihua, ta tijtatzacuiltía. Nopa tamanti cati más quiicnelía, tiquixpolihuiltía quej mejtolime quitamicualoltíaj se yoyomit. Yon se masehuali amo quipiya chicahualisti. Nochi itztoque san quej se ajacat cati ica se talojtzi panotehuaj.