SALMOS 38:4-12

⁴Da' ẕinnj ka' da' bena' ẕbága'gaken yichj ḻáẕda'wa'. Zej naken chia' ka to ywa' zí'iḻe'e.

⁵Žia we' dot da' naka', na' ẕlaḻe'en, na' nóžwgak we' chia' ka'. Žaken chia' ki dan' bena' da' ẕinnj.

⁶Ẕda' ẕwia' ḻo yole, dan' žedoe'ela', na' ẕbeže nyacha'a dot ža, na' yele,

⁷dan' dot da' naka' ẕláḻe'en, na' bi zoa chawe' beḻa' žen chia'.

⁸Nat ni'a na'a, na' žekla' zej nžoẕjen žit yoa'a. Ẕbeže ḻaža'a dan' že' zedle yichj ḻáẕda'wa'.

⁹X̱ana' Dios, da' ẕdan ḻaža'a zóaḻenen Le', na' da' ẕbeže ḻaža'a ẕḻé'ekzlo' Le'.

¹⁰Žat ḻáẕda'wa', na' ba bedó ḻaža'a, na' biž ẕḻe'ela' chawe'.

¹¹Žebíga'gak lježa' ka' zíto'le ni'a che yižwé' chia', na' benne' ẕjo'o ḻi'a chia' ka' ba bkwásgake'.

¹²Benne' ka' žénegekle' gótgake' neda' ẕzáḻa'gake' do yeḻj nich senen neda', na' benne' ka' žénegekle' góngake' neda' ẕia ẕnnégake' chia', na' ẕnnágake' kwia yi'a, na' zóatezegake' wsáka'gake' neda',