Salmos 37:6-29

⁶Chauraga Diosmi allita ruraj cashayquita ricacächenga. Alli runa cashayquitana pï-maytapis musyachenga.

⁷Tayta Diospa ñaupanchöga upällalla cacuy. Pay yanapäshunayquita shuyaray. Ama rabyapaychu alli cayman chayajcunata, ni mana allita rurayta yarpajcunatapis.

⁸Fiyucuna-jananga ama rabyashalla cacuychu. Rabyaga mana allimanmi chayachishunquipaj.

⁹Fiyucunataga Tayta Diosmi illgächenga. Tayta Diosman yäracojcunallanami alli pachacho cawanga.

¹⁰Manapis aycällatanami fiyucunaga illganga. May-jina ashirpis mananami tarinquipänachu.

¹¹Umildicunami ichanga alli pachacho tiyanga. Tayta Diosmi jauca goyächenga.

¹²Fiyucunaga alli runacunata mana alliman chayachiytami yarpan. Fiyu ñawillanwanmi ricapanpis.

¹³Tayta Diosmi ichanga paycunapaj asicun. Musyaycannami fiyucuna illgänanpaj cashanta.

¹⁴Fiyucunaga sablinta, lëchanta, lëcha jitacunanta camaricun pobricunata, alli runacunata wañuchinanpaj.

¹⁵Ichanga quiquinpa sablillanmi shongupa tucsipaycongapaj. Lëchancunapis agullashami ricacongapaj.

¹⁶Aypallata chararpis fiyu runa cananchïpa ruquenga pobrilla carpis alli runa caymi mas alliga.

¹⁷Fiyucunapataga callpantapis ushajpämi Tayta Dios ushacächenga. Allicunatanami ichanga yanapanga.

¹⁸Alli runacunataga Tayta Dios waran-waranmi ricaycan. Paycunaga chasquengapaj imaypis mana ushacajtami.

¹⁹Llaquicuy junajcunachöpis paycunaga manami pengaycho cangachu. Muchuy wichanpis paycunapaga micuynin puchu-puchumi caycangapaj.

²⁰Fiyucunaga ushajpämi illgangapaj. Tayta Diosta chiquejcunaga gaushusha jachanömi rupanga. Goshtaynömi illgacäconga.

²¹Fiyucunaga ristacurcurpis manami päganchu. Alli runami ichanga cuyapäcoj cashpan pï-maytapis macyaycun.

²²Tayta Dios bindisyunta goshan cajcunallami alli pachachöga tiyanga. Pay maldisyunta goshan cajcunami ichanga illganga.

²³Tayta Diosmi runataga alli caminullapa pushan. Allilla goyaptin Tayta Diosga cushicunmi.

²⁴Chay runaga Tayta Dios pushaptinmi tunirpis jatarenga.

²⁵Unay mösu cashä wichanpis, canan auquinna cashäcamapis manami ricashcächu alli runa pishipacaycho goyajtaga. Ni wamrancunapis manami mañapacur purishachu.

²⁶Alli runacunaga imaypis cuyapäcunmi. Chaymi pitapis ristaycun. Wamrancunapis bindisyunyojmi canga.

²⁷Llutancunataga ama ruraychu. Allillata ruray. Chauraga Tayta Dios aunishushayqui pachallachömi tiyanquipaj.

²⁸Tayta Diosga cuyan allita rurajtami. Pay munashannölla cawajcunataga manami gonganchu. Juchasapacunatami ichanga illgächin. Chaynöpami paycunapaga wamrancunapis mana cangachu.

²⁹Alli runacunami ichanga alli pachacho tiyanga. Chayllachömi imaycamapis goyäconga.