SALMOS 37:2-31

²Pampa nimantzi huetzise quen cuapachtli quema quitzontequij. Huan polihuise quen xihuitl catli huaqui.

³Ximotemachi ipan TOTECO huan xijchihua catli cuali. Quen nopa tipajcaitztos ipan motlal huan amo tleno mitzpolos.

⁴Ximohuampoxchihua ihuaya TOTECO, huan yaya mitzmacas catli moyolo quinequi.

⁵Xijcahuili TOTECO ma mitznextili campa tinemis. Ximotemachi ipan ya, huan yaya quichihuas.

⁶Quipannextis catli xitlahuac tijchihua. Quena, quichihuas para nochi ma quiitaca motlalnamiquilis quen nochi quiitaj quema tlahuía tonati ipan tlajcotona.

⁷Xijpiya moyolo quema tiitztoc iixpa TOTECO. Amo ximolini. Xijchiya para yaya quichihuas catli monequi. Amo xicualani ininhuaya catli quipiyaj nochi catli quinequij ama. Amo xiquinchihuili cuenta inijuanti catli quichijtinemij sesen tlamantli catli fiero quisencajtoque.

⁸Amo ximocualancamaca. Xijtlalcahui cualantli, pampa cualantli noja más hueyi mochihuas huan mitzcocos.

⁹TOTECO quintzontlamiltis catli mosisiníaj, pero catli motemachíaj ipan ya quintiochihuas huan moaxcatise nopa tlali.

¹⁰Ayacmo huejcahuas noja itztose amo cuajcualme, teipa masque titlachiyas campa itztoyaj, amo quema sempa tiquinpantis.

¹¹Pero masehualme catli moicnonequij iixpa Toteco itztose ipan nopa cuali tlali huan tlahuel paquise, pampa yaya quintiochihuas hasta mocahuas.

¹²Masehualme catli quicualancaitaj Toteco mosenilhuijtoque tlaque fiero tlamantli huelis quinchihuilise inijuanti catli xitlahuac nemij. Quintlachilíaj ica cualantli huan motlanhuehuechotzaj iniixpa.

¹³Pero Toteco quinhuetzquilía nopa masehualme, pampa quimati para monechcahuía nopa hora quema quintzontlamiltis.

¹⁴Masehualme catli quicualancaitaj Toteco quicopinaj ininmachete para quintlahuisolise catli teicneltzitzi. Quihuitolohuaj inincuahuitol huan quinmelactlachilíaj catli moicnonequij iixpa Toteco. Quena, quinchiyaj para quinmictise catli xitlahuac monejnemiltíaj.

¹⁵Pero catli inijuanti ininmachete calaquis ipan ininyolo, huan inincuahuitolhua pojpostequis huan cuechtic elis.

¹⁶Más cuali nopa quentzi catli quipiya se cuali masehuali huan amo quen imiyaca nochi tlamantli pajpatiyo catli quipiyaj tlajtlacolchihuani.

¹⁷Pampa TOTECO quinquixtilis ininchicahualis catli amo itztoque tlapajpacme iixpa, pero quinfuerzajmacas catli monejnemiltíaj cuali iixpa.

¹⁸Mojmostla TOTECO quitlachilía catli quichihuaj masehualme catli itztoque xitlahuaque iixpa, huan nopa tlali catli quinmacas para iniaxca huejcahuas para nochipa.

¹⁹Quema ajsis tonali catli amo cuali, quinmocuitlahuis para amo más tlaijiyohuise. Quema oncas mayantli, quinmacas catli quicuase hasta mocahuas.

²⁰Pero amo cuajcualme miquise. Quena, quen huaquij nopa yejyectzitzi xochime sacapetlapani huan ayacmo nesi ininyejca, nojquiya polihuise icualancaitacahua TOTECO. Quena, polihuise quen poctli catli quisa huan ayacmo nesi.

²¹Se masehuali catli amo cuali iyolo motlanehui se tlamantli huan ayacmo quicuepa. Pero masehualme catli cuajcualme quipiyaj hueyi ininyolo huan temacaj hasta mocahua.

²²Catli TOTECO quintiochihua quiselise nopa tlali catli yaya quinmacas, pero catli TOTECO quintelchihua quintzontlamiltis.

²³TOTECO quichihua ma eli temachtli sesen paso ipan inemilis se cuali masehuali, huan nopa masehuali paqui miyac pampa nemi cuali.

²⁴Masque huetzis nopa cuali masehuali, amo mocahuas nepa huetztoc, pampa TOTECO quitlananas ica imax.

²⁵Na nojquiya nitelpocatixtoya huan ama ya nihuehuentzi, pero amo quema niquitac TOTECO quitlahuelcahua se masehuali catli itztoc xitlahuac iixpa. Niyon iconehua se cuali masehuali amo niquinitztoc sintla motlaejehuíaj para ica panose.

²⁶Mojmostla se cuali masehuali quintlasojtla sequinoc huan quintlanejtía catli monequi. Iconehua se cuali tlacatl tepalehuíaj.

²⁷Huajca sintla tijnequi tiitztos para nochipa, xijtlalcahui tlajtlacoli huan xijchihua san catli cuali.

²⁸Pampa TOTECO quipactía catli xitlahuac huan amo quema quinhuejcamajcahuas iaxcahua catli itztoque temachme. ¡Amo! Techmocuitlahuis para nochipa. Pero quintzontlamiltis nochi masehualme catli amo cuajcualme, huan amo quincahuilis niyon se iniixhui.

²⁹Masehualme catli itztoque xitlahuaque iixpa TOTECO moaxcatise nopa tlali catli yaya quinmacas, huan nepa itztose para nochipa.

³⁰Se masehuali catli itztoc cuali iixpa Toteco camanalti ica tlalnamiquilistli huan quiijtohua catli xitlahuac.

³¹Quipiya Icamanal Toteco Dios ipan iyolo, huan yeca amo huetzis ipan tlajtlacoli.