SALMOS 37:18-28

¹⁸Mojmostla TOTECO quitlachilía tlen quichihuaj tlacame tlen itztoque xitlahuaque iixpa, huan nopa tlali tlen quinmacas para iniaxca huejcahuas para nochipa.

¹⁹Quema ajsis tonali tlen ax cuali, quinmocuitlahuis para ax más tlaijiyohuise. Quema oncas mayantli, quinmacas tlen quicuase hasta mocahuas.

²⁰Pero ax cuajcualme miquise. Quena, queja huaquij nopa yejyectzitzi xochitl sacapetlaixco huan ayoc nesi ininyejyejca, nojquiya polihuise icualancaitacahua TOTECO. Quena, polihuise queja poctli tlen quisa huan ayoc nesi.

²¹Se tlacatl tlen ax cuali iyolo motlanehui se tlamantli huan ayoc quicuepa. Pero tlacame tlen cuajcualme quipiyaj hueyi ininyolo huan temacaj hasta mocahua.

²²Tlen TOTECO quintiochihua quiselise nopa tlali tlen yajaya quinmacas, pero tlen TOTECO quintelchihua quintzontlamiltis.

²³TOTECO quichihua ma eli temachtli sesen paso ipan iyolis se cuali tlacatl, huan nopa tlacatl paqui miyac pampa nemi cuali.

²⁴Yonque huetzis nopa cuali tlacatl, ax mocahuas nepa huetztoc, pampa TOTECO quitlalanas ica ima.

²⁵Na nojquiya nitelpocatixtoya huan ama ya nihuehuentzi, pero ax quema niquitac TOTECO quitlahuelcahua se tlacatl tlen itztoc xitlahuac iixpa. Niyon iconehua se cuali tlacatl ax niquinitztoc intla motlaejehuíaj para ica panose.

²⁶Mojmostla se cuali tlacatl quintlasojtla sequinoc huan quintlanejtía tlen monequi. Iconehua se cuali tlacatl tepalehuíaj.

²⁷Huajca intla tijnequi tiitztos para nochipa, xijtlalcahui tlajtlacoli huan xijchihua san tlen cuali.

²⁸Pampa TOTECO quipactía tlen xitlahuac huan ax quema quinhuejcamajcahuas iaxcahua tlen itztoque temachme. ¡Axtle! Techmocuitlahuis para nochipa. Pero quintzontlamiltis nochi tlacame tlen ax cuajcualme, huan ax quincahuilis niyon se iniixhui.