SALMOS 37:15-39

¹⁵Pero tlen inijuanti ininmachete calaquis ipan ininyolo, huan inincuahuitolhua pojpostequis huan cuechtic elis.

¹⁶Más cuali nopa quentzi tlen quipiya se cuali tlacatl huan ax queja imiyaca nochi tlamantli pajpatiyo tlen quipiyaj tlajtlacolchihuani.

¹⁷Pampa TOTECO quinquixtilis ininchicahualis tlen ax itztoque tlapajpacme iixpa, pero quinfuerzajmacas tlen monejnemiltíaj cuali iixpa.

¹⁸Mojmostla TOTECO quitlachilía tlen quichihuaj tlacame tlen itztoque xitlahuaque iixpa, huan nopa tlali tlen quinmacas para iniaxca huejcahuas para nochipa.

¹⁹Quema ajsis tonali tlen ax cuali, quinmocuitlahuis para ax más tlaijiyohuise. Quema oncas mayantli, quinmacas tlen quicuase hasta mocahuas.

²⁰Pero ax cuajcualme miquise. Quena, queja huaquij nopa yejyectzitzi xochitl sacapetlaixco huan ayoc nesi ininyejyejca, nojquiya polihuise icualancaitacahua TOTECO. Quena, polihuise queja poctli tlen quisa huan ayoc nesi.

²¹Se tlacatl tlen ax cuali iyolo motlanehui se tlamantli huan ayoc quicuepa. Pero tlacame tlen cuajcualme quipiyaj hueyi ininyolo huan temacaj hasta mocahua.

²²Tlen TOTECO quintiochihua quiselise nopa tlali tlen yajaya quinmacas, pero tlen TOTECO quintelchihua quintzontlamiltis.

²³TOTECO quichihua ma eli temachtli sesen paso ipan iyolis se cuali tlacatl, huan nopa tlacatl paqui miyac pampa nemi cuali.

²⁴Yonque huetzis nopa cuali tlacatl, ax mocahuas nepa huetztoc, pampa TOTECO quitlalanas ica ima.

²⁵Na nojquiya nitelpocatixtoya huan ama ya nihuehuentzi, pero ax quema niquitac TOTECO quitlahuelcahua se tlacatl tlen itztoc xitlahuac iixpa. Niyon iconehua se cuali tlacatl ax niquinitztoc intla motlaejehuíaj para ica panose.

²⁶Mojmostla se cuali tlacatl quintlasojtla sequinoc huan quintlanejtía tlen monequi. Iconehua se cuali tlacatl tepalehuíaj.

²⁷Huajca intla tijnequi tiitztos para nochipa, xijtlalcahui tlajtlacoli huan xijchihua san tlen cuali.

²⁸Pampa TOTECO quipactía tlen xitlahuac huan ax quema quinhuejcamajcahuas iaxcahua tlen itztoque temachme. ¡Axtle! Techmocuitlahuis para nochipa. Pero quintzontlamiltis nochi tlacame tlen ax cuajcualme, huan ax quincahuilis niyon se iniixhui.

²⁹Tlacame tlen itztoque xitlahuaque iixpa TOTECO moaxcatise nopa tlali tlen yajaya quinmacas, huan nepa itztose para nochipa.

³⁰Se tlacatl tlen itztoc cuali iixpa Toteco camati ica tlalnamiquilistli huan quiijtohua tlen xitlahuac.

³¹Quipiya Itlajtol Toteco Dios ipan iyolo, huan yeca ax huetzis ipan tlajtlacoli.

³²Tlacame tlen quicocolíaj Toteco Dios quintlachilíaj tlacame tlen monejnemiltíaj xitlahuac. Quitemohuaj quejatza huelis quinteilhuise para ma quinmictica.

³³Pero TOTECO ax quincahuas para cuali tlacame ma mocahuaca ininmaco inincualancaitacahua. Quema ajsise iixpa se juez, ax quincahuas ma quintlatzacuiltica tlen cuajcualme ica se tlamantli tlen ax quichijtoque.

³⁴Ximotemachi ipan TOTECO huan xijchihua tlen yajaya quinequi, pampa yajaya mitzhuejcapantlalis huan mitzmacas nopa tlali. Huan tiquitas queja quintzontlamiltis tlen quinpactía tlajtlacolchihuase.

³⁵Pampa na niquinitztoc tlacame tlen quicocolíaj Toteco, inijuanti mohueyimatij huan temajmatíaj. Pampa quipiyaj chicahualistli queja se cuahuitl hueyi huan xajcaltic.

³⁶Pero panoc se ome tonal tlantiyajque huan ayoc niquinitac campa itztoyaj. Huan yonque niquintemo, ayoc niquinpanti.

³⁷Pero xijtlachili queja monejnemiltía se tlacatl tlen itztoc xitlahuac iixpa TOTECO, yajaya tlen axaca hueli quiteilhuis. Nopa tlacatl quipiyas tlasehuilistli huan itztos ica yejyectzi para nochipa.

³⁸Pero TOTECO ica se huelta quintlamitzontlamiltis inijuanti tlen ax quitlepanitaj. Huan ax quicajtehuase niyon se iniixhui.

³⁹TOTECO quinmaquixtía tlen itztoque xitlahuaque iixpa. Quinfuerzajmaca quema huala tlaohuijcayotl.