SALMOS 37:13-29

¹³Pero Toteco quinhuetzquilía nopa masehualme, pampa quimati para monechcahuía nopa hora quema quintzontamiltis.

¹⁴Masehualme cati quicualancaitaj Toteco quicopinaj inimacheta para quinmajcahuilise cati teicneltzitzi. Quihuitolohuaj inincuahuitol huan quinmelaitaj cati moechcapanohuaj iixpa Toteco. Quena, quinchiyaj para quinmictise cati xitahuac monejnemiltíaj.

¹⁵Pero cati inijuanti inimacheta calaquis ipan iniyolo, huan inincuahuitolhua pojpostequis huan cuechtic elis.

¹⁶Más cuali nopa quentzi cati quipiya se cuali masehuali huan amo miyac tamanti pajpatiyo cati quipiyaj tajtacolchihuani.

¹⁷Pampa TOTECO quinquixtilis ininchicahualis cati amo itztoque tapajpacme iixpa, pero quinfuerzajmacas cati monejnemiltíaj cuali iixpa.

¹⁸Mojmosta TOTECO quitachilía cati quichihuaj masehualme cati itztoque xitahuaque iixpa, huan nopa tali cati quinmacas para iniaxca huejcahuas para nochipa.

¹⁹Quema ajsis tonali cati amo cuali, quinmocuitahuis para amo más taijyohuise. Quema oncas mayanti, quinmacas ten quicuase hasta mocahuas.

²⁰Pero amo cuajcualme miquise. Quena, quej huaquij nopa cuajcualtzitzi xochime sacapetaixco huan ayecmo nesi iniyejyejca, nojquiya polihuise icualancaitacahua TOTECO. Quena, polihuise quej pocti cati quisa huan ayecmo nesi.

²¹Se masehuali cati amo cuali iyolo motanehui se tamanti huan ayecmo quicuepa. Pero masehualme cati cuajcualme quipiyaj hueyi iniyolo huan temacaj hasta mocahua.

²²Cati TOTECO quintiochihua quiselise nopa tali cati yaya quinmacas, pero cati TOTECO quintelchihua quintzontamiltis.

²³TOTECO quichihua ma eli temachti sese paso ipan inemilis se cuali masehuali, huan nopa masehuali paqui miyac pampa nemi cuali.

²⁴Masque huetzis nopa cuali masehuali, amo mocahuas huetztoc, pampa TOTECO quitananas ica imax.

²⁵Na nojquiya nitelpocatixtoya huan ama ya nihuehuentzi, pero amo quema niquitac TOTECO quitahuelcahua se masehuali cati itztoc xitahuac iixpa. Yon iconehua se cuali masehuali amo niquinitztoc sinta motaejehuíaj para ica panose.

²⁶Mojmosta se cuali masehuali quintasojta sequinoc huan quintanejtía cati monequi. Iconehua se cuali tacat tepalehuíaj.

²⁷Huajca sinta tijnequi tiitztos para nochipa, xijtalcahui tajtacoli huan xijchihua san cati cuali.

²⁸Pampa TOTECO quipactía cati xitahuac huan amo quema quinhuejcamajcahuas iaxcahua cati itztoque temachme. ¡Amo! Techmocuitahuis para nochipa. Pero quintzontamiltis nochi masehualme cati amo cuajcualme, huan amo quincahuilis yon se iniixhui.

²⁹Masehualme cati itztoque xitahuaque iixpa TOTECO moaxcatise nopa tali cati yaya quinmacas, huan nepa itztose para nochipa.