Text copied!
CopyCompare
Icamanal toteco; Santa Biblia - SALMOS - SALMOS 37

SALMOS 37:11-37

Help us?
Click on verse(s) to share them!
11Pero masehualme cati moechcapanohuaj iixpa Toteco itztose ipan nopa cuali tali huan tahuel paquise, pampa yaya quintiochihuas hasta mocahuas.
12Masehualme cati quicualancaitaj Toteco mosenilhuijtoque taya fiero tamanti huelis quinchihuilise inijuanti cati xitahuac nemij. Quintachilíaj ica cualanti huan motanhuehuechotzaj iniixpa.
13Pero Toteco quinhuetzquilía nopa masehualme, pampa quimati para monechcahuía nopa hora quema quintzontamiltis.
14Masehualme cati quicualancaitaj Toteco quicopinaj inimacheta para quinmajcahuilise cati teicneltzitzi. Quihuitolohuaj inincuahuitol huan quinmelaitaj cati moechcapanohuaj iixpa Toteco. Quena, quinchiyaj para quinmictise cati xitahuac monejnemiltíaj.
15Pero cati inijuanti inimacheta calaquis ipan iniyolo, huan inincuahuitolhua pojpostequis huan cuechtic elis.
16Más cuali nopa quentzi cati quipiya se cuali masehuali huan amo miyac tamanti pajpatiyo cati quipiyaj tajtacolchihuani.
17Pampa TOTECO quinquixtilis ininchicahualis cati amo itztoque tapajpacme iixpa, pero quinfuerzajmacas cati monejnemiltíaj cuali iixpa.
18Mojmosta TOTECO quitachilía cati quichihuaj masehualme cati itztoque xitahuaque iixpa, huan nopa tali cati quinmacas para iniaxca huejcahuas para nochipa.
19Quema ajsis tonali cati amo cuali, quinmocuitahuis para amo más taijyohuise. Quema oncas mayanti, quinmacas ten quicuase hasta mocahuas.
20Pero amo cuajcualme miquise. Quena, quej huaquij nopa cuajcualtzitzi xochime sacapetaixco huan ayecmo nesi iniyejyejca, nojquiya polihuise icualancaitacahua TOTECO. Quena, polihuise quej pocti cati quisa huan ayecmo nesi.
21Se masehuali cati amo cuali iyolo motanehui se tamanti huan ayecmo quicuepa. Pero masehualme cati cuajcualme quipiyaj hueyi iniyolo huan temacaj hasta mocahua.
22Cati TOTECO quintiochihua quiselise nopa tali cati yaya quinmacas, pero cati TOTECO quintelchihua quintzontamiltis.
23TOTECO quichihua ma eli temachti sese paso ipan inemilis se cuali masehuali, huan nopa masehuali paqui miyac pampa nemi cuali.
24Masque huetzis nopa cuali masehuali, amo mocahuas huetztoc, pampa TOTECO quitananas ica imax.
25Na nojquiya nitelpocatixtoya huan ama ya nihuehuentzi, pero amo quema niquitac TOTECO quitahuelcahua se masehuali cati itztoc xitahuac iixpa. Yon iconehua se cuali masehuali amo niquinitztoc sinta motaejehuíaj para ica panose.
26Mojmosta se cuali masehuali quintasojta sequinoc huan quintanejtía cati monequi. Iconehua se cuali tacat tepalehuíaj.
27Huajca sinta tijnequi tiitztos para nochipa, xijtalcahui tajtacoli huan xijchihua san cati cuali.
28Pampa TOTECO quipactía cati xitahuac huan amo quema quinhuejcamajcahuas iaxcahua cati itztoque temachme. ¡Amo! Techmocuitahuis para nochipa. Pero quintzontamiltis nochi masehualme cati amo cuajcualme, huan amo quincahuilis yon se iniixhui.
29Masehualme cati itztoque xitahuaque iixpa TOTECO moaxcatise nopa tali cati yaya quinmacas, huan nepa itztose para nochipa.
30Se masehuali cati itztoc cuali iixpa Toteco camanalti ica talnamiquilisti huan quiijtohua cati xitahuac.
31Quipiya Icamanal Toteco Dios ipan iyolo, huan yeca amo huetzis ipan tajtacoli.
32Masehualme cati quicualancaitaj Toteco Dios quintachilíaj masehualme cati monejnemiltíaj xitahuac. Quitemohuaj quenicatza huelis quintelhuise para ma quinmictica.
33Pero TOTECO amo quincahuas para cuali masehualme ma mocahuaca inimaco inincualancaitacahua. Quema ajsise iixpa se juez, amo quincahuas ma quintatzacuiltica cati cuajcualme ica se tamanti cati amo quichijtoque.
34Ximotemachi ipan TOTECO huan xijchihua cati yaya quinequi, pampa yaya mitzhuejcapantalis huan mitzmacas nopa tali. Huan tiquitas quenicatza quintzontamiltis cati quinpactía tajtacolchihuase.
35Pampa na niquinitztoc masehualme cati quicualancaitaj Toteco, inijuanti mohueyimatij huan temajmatíaj. Pampa quipiyaj chicahualisti quej se cuahuit cati hueyi huan xajcaltic.
36Pero panoc se ome tonali tantiyajque huan ayecmo niquinitac campa itztoyaj. Huan masque niquintemo, ayecmo niquinpanti.
37Pero xijtachili quenicatza monejnemiltía se masehuali cati itztoc xitahuac iixpa TOTECO, yaya cati amo aqui hueli quitelhuis ica se tamanti cati amo monequi. Nopa masehuali quipiyas tasehuilisti huan itztos ica cuajcualtzi para nochipa.

Read SALMOS 37SALMOS 37
Compare SALMOS 37:11-37SALMOS 37:11-37