SALMOS 37:11-25

¹¹san benne' gax̱jw ḻaže' ka' gata' chégake' yežlyó, na' sí'gake' yeḻa' ba nez che yeḻa' ẕga'n chawe'.

¹²Benne' wen da' ẕinnj žénele' bi da' gone' che benne' chawe'. Ḻo yeḻa' ẕža'a chie' bi ẕḻe'ele' ḻe' chawe'.

¹³X̱anžo Dios wẕížekze' chegak benne' wen da' ẕinnj ka' dan' ẕḻe'ele' za' gawze ža kwia yí'gake'.

¹⁴Benne' wen da' ẕinnj ka' ẕbéjgake' ya ntoche' ka', na' ba nzégake' yag ntóche'do' chégake' ka' nich wžía yí'gake' benne' yache' ka', na' benne' ka' žiážjegekle', nich gótgake' benne' ka' žóngake' da' naken chawe'.

¹⁵Ya ntoche' chégake' chazen ḻaẕdo' kwíngakkze', na' gáchjwgak yag ntóche'do' chégake' ka'.

¹⁶Záka'že da' do' da' nape benne' chawe' ka yeḻa' wnni'a ẕen da' zej nape benne' wen da' ẕinnj ka',

¹⁷dan' gátgakkze ni'a na'gak benne' wen da' ẕinnj ka', san X̱anžo na'kze ẕwíakze' benne' chawe' ka'.

¹⁸Nonbia' X̱anžon' baḻ ža sóagake' nbángake'. Da' zej nape benne' chawe' ka' soan to chi'ize.

¹⁹Bi yedoé'egekle benne' ka' kate' bi žak chégake', na' ḻo ža kate' žak wbín gata' da' gáwgake',

²⁰san kwia yi'gak benne' wen da' ẕinnj ka', na' benne' ka' ẕží'igake' che X̱anžon', gak chégake' ka žak chegak yeje yix̱e' ka'. Te chégake', na' nítgekle' ka ẕnit žen che yi'.

²¹Benne' ka' bi zej nake' chawe' to da' ẕnnábgake' to chí'ido'ze, san bi ženéẕjwgaken', san benne' chawe' žeyache' ḻáže'le' lježe' ka', na' ẕneẕjwe' bi da' žiážjele'.

²²Benne' ka' ẕḻe'el X̱anžon' ḻégake' chawe', gata' chégake' yežlyó, san benne' ka' bi ẕḻe'ele' chawe', kwia yí'gakkze'.

²³Da' žongak benne' chawe' ka' naken da' bḻoe'el X̱anžon' ḻégake', na' ẕḻe'ele' chawe' yógo'te da' žóngake'.

²⁴Kate' chejchégwgak benne' chawe' ka', bi chejchégwgake' to chi'ize dan' nox̱w X̱anžon' ná'gake'.

²⁵Goka' x̱kwide', na' na'a naka' benne' gole, na' batkle bḻe'ela' to benne' chawe' wsán Dios ḻe', na' bi ẕdagak ẕa'sógake' ka' ẕnnábgakbe' bi da' gonn no benne' chégakbe'.