SALMOS 37:1-20

¹Bi kwe' zedlo' ni'a che da' žongak benne' ka' bi zej nake' chawe', na' bi ge'elo' ni'a che da' zej nape benne' wen da' ẕinnj ka',

²dan' te chegak benne' ka' ka žak che yix̱e' biž, na' gak chégake' ka žak che yix̱e' da' nžogen.

³Bx̱en ḻaže' X̱anžo Dios, na' ben da' chawe', na' soakzo' nbano', na' si'kzo' yeḻa' ba nez.

⁴Wyáz ḻaže' X̱anžon', na' Ḻe' gonnkze' chio' da' ẕdan ḻažo'o.

⁵Bzoa kwino' ḻo na' X̱anžon', na' bx̱en ḻaže'e Ḻe', na' Ḻe' gone' da' ẕnnablo'.

⁶Wḻoe'ele' da' chawe' da' nako' ka to da' žsa'ní', na' da' ḻi ḻaže' chio' ka ḻawe' ža.

⁷Wzóa žize ḻaw X̱anžon', na' bẕen ḻaže'e Ḻe'. Bi kwe' zedlo' ni'a che no benne' ẕzi'e yeḻa' ba nez, bennen' žonkze' da' bi nak chawe'.

⁸Bzoa cheḻa'ale yeḻa' yichj ža'a, na' bi žo'o. Bi gak ḻažo'o yebi'o che bennen' bi nake' chawe',

⁹dan' wžía yi' Dios benne' wen da' ẕinnj ka', san benne' ka' žx̱en ḻáže'gake' X̱anžon', gata' chégake' yežlyó.

¹⁰Yextído'ze biž soa bennen' bi nake' chawe'. Ḻe'elo' liže latje bennen' san biž soe' ga na',

¹¹san benne' gax̱jw ḻaže' ka' gata' chégake' yežlyó, na' sí'gake' yeḻa' ba nez che yeḻa' ẕga'n chawe'.

¹²Benne' wen da' ẕinnj žénele' bi da' gone' che benne' chawe'. Ḻo yeḻa' ẕža'a chie' bi ẕḻe'ele' ḻe' chawe'.

¹³X̱anžo Dios wẕížekze' chegak benne' wen da' ẕinnj ka' dan' ẕḻe'ele' za' gawze ža kwia yí'gake'.

¹⁴Benne' wen da' ẕinnj ka' ẕbéjgake' ya ntoche' ka', na' ba nzégake' yag ntóche'do' chégake' ka' nich wžía yí'gake' benne' yache' ka', na' benne' ka' žiážjegekle', nich gótgake' benne' ka' žóngake' da' naken chawe'.

¹⁵Ya ntoche' chégake' chazen ḻaẕdo' kwíngakkze', na' gáchjwgak yag ntóche'do' chégake' ka'.

¹⁶Záka'že da' do' da' nape benne' chawe' ka yeḻa' wnni'a ẕen da' zej nape benne' wen da' ẕinnj ka',

¹⁷dan' gátgakkze ni'a na'gak benne' wen da' ẕinnj ka', san X̱anžo na'kze ẕwíakze' benne' chawe' ka'.

¹⁸Nonbia' X̱anžon' baḻ ža sóagake' nbángake'. Da' zej nape benne' chawe' ka' soan to chi'ize.

¹⁹Bi yedoé'egekle benne' ka' kate' bi žak chégake', na' ḻo ža kate' žak wbín gata' da' gáwgake',

²⁰san kwia yi'gak benne' wen da' ẕinnj ka', na' benne' ka' ẕží'igake' che X̱anžon', gak chégake' ka žak chegak yeje yix̱e' ka'. Te chégake', na' nítgekle' ka ẕnit žen che yi'.