SALMOS 36:1-12

¹Da' ẕinnj da' žon bennen' ẕzoe' Dios cheḻa'ale ẕcháḻjḻenen ḻe' ḻo yichj ḻáẕda'we'. Bi ẕdan ḻáže'kze' gape' Dios ba la'ne.

²Che ḻen ẕḻoe'el kwine' ka to benne' ẕente. Žekle' bi ẕḻe'el Dios da' ẕinnj da' žone', na' bi ẕže'e ḻe'.

³Da' ẕchaḻjze' naken da' ẕinnj, na' da' wen ḻaže'. Biž žejni'ile' binlo, na' biž žone' da' chawe'.

⁴Ẕlab ḻaže'e da' bi nak chawe' katen' die' gan ẕtase'. Yoe'e nez da' bi naken chawe'. Bi žénele' wsane' žone' da' ẕinnj.

⁵X̱ana' Dios, ẕente nak yeḻa' žeyache' ḻaže' chio' dan' ẕžinten ẕan ya'abá. Yeḻa' ḻi ḻaže' chio' ẕžinten ḻo bejw.

⁶Da' chawe' da' nako' naken ka to ya'a ẕen chio', na' ka ẕchi'a ḻažo'o naken ka to nisdo' zil-ḻe'e. X̱ana' Dios, ẕwíakzo' benách ka', na' bia yix̱e' ka'.

⁷Ẕenḻe'e nak yeḻa' žeyache' ḻaže' chio', Dios. Che ḻen žx̱en ḻáže'gak benne' ka' Le' ka žongak bríse'do' ka' ẕkache' kwíngakba' ẕan x̱il ẕkoko'.

⁸Yéljgekle' ḻen da' deḻe'e ližo' na' Le' wye'jo' ḻégake' da' naken ka to yegw da' yožen nis dẕi'.

⁹Gan zo' Le' zoa gan žaḻ nis dan' žonnen yeḻa' nban. Ḻo yeḻa' baní' chio' ẕḻe'elto' da' nak baní'.

¹⁰Beyache' ḻaže'l benne' ka' zej nónbi'e Le', na' bzoa chegak benne' ḻi ḻaže' ka' da' nak chawe'.

¹¹Bi go'o latje benne' ẕka'n ẕen kwine' tíḻ-ḻene' neda', na' bi wchíx̱ benne' wen da' ẕinnj neda'.

¹²Chejchégwgak benne' ka' žóngake' da' ẕinnj. Le' beno' ga bejchégwgak benne' ka', na' bi gak yeyásgake'.