SALMOS 36:1-11

¹Nijpixtoc ipan noyolo tlen nijnequi niteyolmelahuas tlen inintlajtlacol ax cuajcualme. Ax cuajcualme quiilcahuaj Toteco Dios huan ax quiimacasij.

²Mohueyimatij ica ininselti hasta moilhuíaj yajaya ax hueli quichihuas cuenta nochi tlen fiero quichijtinemij, huan yeca ax quintlatzacuiltis.

³Quisa inincamaco senquistoc tlen fiero huan tlen ax melahuac. Quipolojtoque inintlalnamiquilis, huan ayoc quichihuaj tlen cuali.

⁴Quema motecaj ipan inintlapech para cochise, san quisencahuaj tlachque tlajtlacoli quichihuase. Moneltlatzquilijtoque ipan iniojhui tlen fiero huan san tlen ax cuali quinequij.

⁵TOTECO, motlasojtlacayo quinajsi nochi tlacame huan onajsi hasta elhuicac huan hasta campa mixtli. Nelía titemachtli.

⁶Tiitztoc tlahuel tixitlahuac huan ax quema timopatla. Tiitztoc temachtli queja nopa huejhueyi tepetini campa tlahuel tlahuejcapa. Nelxitlahuac titetlajtolsencahua, huan ax hueli tijmachilíaj motlanejnehuilis, pampa eltoc queja nopa hueyi atl tlen onpano huejcatla. ¡TOTECO! Ta san se tiquinmocuitlahuía queja tlacame huan tecuanime.

⁷Toteco Dios, nelía yejyectzi moteicnelilis tlen ax quema techcahua. Yeca tlacame tlen quipiyaj tlanahuatili huan tlen teicneltzitzi monechcahuíaj campa ta para xiquinmanahui. Quena, mochihuaj queja pilpiyotzitzi tlen calaquij ieltlapaltzala ininnana.

⁸Tlacame tlen mitztemohuaj ixhuij cuali ica nopa tlatiochihualistli tlen tiquinmaca nepa mochaj. Eltoc queja se hueyi tlacualistli tlen titechtencahuilía toixtla. Titechcahuilía ma tiatlica ipan nopa atlajtli tlen temaca ajhuiyac atl. Quena, nochi tlen tijtlajtlaníaj titechmaca.

⁹Pampa ta titechmaca yolistli nochi tlen tiitztoque, huan pampa titechmaca tlahuili, tojuanti tihuelij titlachiyaj.

¹⁰Nimitztlajtlanía para mojmostla xitechicneli tojuanti tlen timitzixmatij. Nochipa titechchihuilía tlen xitlahuac nochi tojuanti tlen ipan toyolo tijnequij tijchihuase tlen cuali.

¹¹Amo xijcahua para ma nopan moquejquetzaca inijuanti tlen mohueyimatij. Niyon amo xiquincahuili ma nechtojtocaca ax cuajcualme.