SALMOS 35:5-25

⁵Queja se ajacatl quihuica tlasoli, ielhuicac ejca TOTECO ma quintotocatiyas tlen nechcocolíaj.

⁶Ma onca tzintlayohuilotl ipan iniojhui. Ma tlaxixitlacas campa nemij para ma huetzica, huan ielhuicac ejca Toteco ma quintepotztocatiyas para quinmictis.

⁷Pampa yonque ax tleno nijchijtoya, quitlalijque se tlaquetztli para nechmasiltise. Quixajque se tlacoyoctli para ipan ma nihuetzi.

⁸Ma quintlalochajsi se hueyi cuesoli. Ma masica ipan nopa tlaquetztli tlen inijuanti quitlalijque huan ma motzontlamiltica.

⁹Huajca quena, na nipaquis ipan TOTECO. Nijpiyas paquilistli pampa TOTECO nechmaquixtijtos.

¹⁰Ica nochi noyolo niquijtos: “Axaca seyoc queja ta, TOTECO. Tiquinmocuitlahuía tlen ax quipiyaj fuerza para tlacame tlen tetique ax huelis quinajsise. Quena, tiquinmanahuía tlen teicneltzitzi huan tlen ax quipiyaj tlen inintechmonequi. Tiquinmanahuía ininmaco tlen quinequij quintlacuijcuilise.”

¹¹Motlalanaj tlacame tlen ax cuajcualme huan nechcocolíaj. Inijuanti tlatestigojquetzaj tlen ax neli, huan nechtlaijilhuíaj ica tlamantli tlen ax nijmati.

¹²Nechtlaxtlahuíaj ica tlen ax cuali, yonque nelcuali niquinchihuilijtoc. San quinequij nechcuesolmacase.

¹³Pero quema inijuanti mococojque, nimocueso ininhuaya huan nimoyoyonti ica nopa fiero yoyomitl para nochi quimatise nimocuesohuayaya ininhuaya. Hasta nimosajqui ininpampa inijuanti para nijtlajtlanis TOTECO ma quinchicahua. Pero TOTECO ax quicajqui tlen niquilhui.

¹⁴Nimocuesojtinemiyaya queja se tlamantli fiero ipantitosquía se nohuampo o se noicni. Nimocueso huan nichocatinemiyaya queja mictosquía nonana.

¹⁵Pero quema na nechajsic cuesoli, inijuanti pajque. Quema nimotepotlami huan nihuetzqui, inijuanti mosentilijque huan nechhuetzquilijque. Tlacame tlen ax cuajcualme huan tlen nechixmatiyayaj nechijilnamiquiyayaj huan nechmaquiliyayaj yonque ax tleno nijchijtoya.

¹⁶Queja tlacame tlen ax cuajcualme quihuetzquilíaj tlen hueli, inijuanti noca pajque huan motlancochhuehuechotzque noixtla ica cualantli.

¹⁷TOTECO, ¿hasta quema noja san tijtlachilijtos nochi ni tlamantli? Xinechmanahui para ax nechmictise, pampa san setzi noyolis. Xinechmaquixti tlen ni tlacame tlen mochihuaj queja tecuanime tlen quinequij nechhuejhuelose.

¹⁸Huan nimitztlascamatis tlamiyacapa ipan tlasentilistli. Iniixtla nochi nopa miyac motlacajhua nimitzpaquilismacas.

¹⁹Amo xiquincahuili nocualancaitacahua tlen istlacatij ma noca paquica. Amo xiquincahuili tlen nechcocolíaj ma moixijcopilica ica paquilistli noixtla pampa nimocuesohua.

²⁰Inijuanti ax tenotzaj ica cuali. San moilhuíaj quejatza huelis quincajcayahuase tlacame tlen itztoque ica yejyectzi ipan ni tlali.

²¹Nechtlaijilhuíaj huan quiijtohuaj: “¡Xiquitaca tijnelitztoque tlen fiero quichijqui!”

²²TOTECO, ta tiquitztoc tlen quichihuaj. Amo san xiitzto huan ax tleno tijchihuas. ¡Amo xinechtlahuelcahua!

²³Ximotlalana huan xinechchihuili tlen xitlahuac huan melahuac. Quena, TOTECO, xiisihui huan xinechmanahuiqui.

²⁴TinoTeco Dios, ta tlen ipa titetlajtolsencahua xitlahuac, xitenextili para ax tleno nijchijtoc. Amo xiquincahuili nocualancaitacahua ma noca huetzcaca.

²⁵Ma ax nopanti tlen inijuanti quinequij. Ma ax quiijtoca nechixpolojtoque. Amo xiquincahuili ma moilhuica para inijuanti nechtlantoque.