SALMOS 34:4-19

⁴Nijtzajtzili TOTECO ma nechpalehuiqui, huan yaya nechtacaquili huan nechmanahui ten nochi cati nechmajmatiyaya.

⁵Sequinoc cati motemachíaj ipan Toteco ixcahuanij ica paquilisti nojquiya, por cati yaya quinchihuilijtoc. Amo quema pinahuase.

⁶Masque nipilteicneltzi, nijtzajtzili TOTECO, huan yaya nechmaquixti ten nochi tamanti cati nechtequipachohuayaya.

⁷Iilhuicac ejca TOTECO quinmocuitahuía nochi cati quiimacasij TOTECO, huan yaya quinmanahuía.

⁸Xijyejyecoca TOTECO huan anquiitase para melahuac cuali iyolo ica tojuanti. Hueyi paquilisti quipiyaj nochi masehualme cati ipan ya motemachíaj.

⁹Nochi amojuanti cati aniaxcahua TOTECO, xiquimacasica, pampa nochi cati quitepanitaj amo teno quinpolohua.

¹⁰Nopa tecuanime cati más quipiyaj chicahualisti quemantica mayantinemij huan amo quipantíaj ten quicuase, pero masehualme cati quitemohuaj TOTECO quipiyase nochi cati cuali.

¹¹Xihualaca noconehua, huan techtacaquilica, huan nimechmachtis quenicatza monequi anquitepanitase TOTECO, huan anquiimacasise anquiixpanose.

¹²¿Tijnequi tiitztos ica cuajcualtzi? ¿Tijnequi tihuejcahuas ipan ni taltipacti, huan tiquitas cati cuali?

¹³Monequi xijmocuitahuis monenepil para amo tiquinmahuispolos sequinoc ica istacatili.

¹⁴Ximoiyocatali ica cati amo cuali, huan xijchihua san cati xitahuac. Xijchihuaca cati anhuelij para ma onca tasehuilisti inihuaya nochi masehualme. Quena, ya nopa xijtemoca ica nochi amoyolo.

¹⁵TOTECO quintachilía cati nemij xitahuac iixpa, huan san quichiya para quinmacas cati quitajtanise.

¹⁶Pero TOTECO sencualantoc ica inijuanti cati quichihuaj cati fiero. Quintzontamiltis para ayecmo aqui quinelnamiquis ipan ni taltipacti.

¹⁷Quema masehualme cati itztoque xitahuaque iixpa TOTECO quitzajtzilíaj, yaya quintacaquilía. Huan quinmanahuía ten nochi inincuesolhua.

¹⁸TOTECO itztoc ininechca masehualme cati motequipachohuaj. Huan quinmaquixtía cati motequipachohuaj ica inintajtacolhua.

¹⁹Se masehuali cati itztoc xitahuac iixpa TOTECO quipiya miyac tequipacholi, pero TOTECO quimanahuía ica nochi cati ipanti.