Salmos 34:10-22

¹⁰Tumuz wip wanir nda katungtsee yaku, marizimunsha kiyung kachiychinlliniya. Itaru, yuwsha tputs Apanllee chinaku, anoomsha nda katungats pishtachiya.

¹¹Ashiriya, naanints nlluris. Nuwaa kuki mazinangtsa. Apanllish wanasiri tachitamaam tayaspatachintspa.

¹²Siy zapan masach mapiyrus taamaam zandkinaareesa,

¹³Ashiri nda mantsir tsiyatamaam saanaatsis wanasir ksutangtsa. Ngutis tputsee tamasingarus ngichintspa.

¹⁴Yutaritshishee kasayarus, wanasir chinangtsa. Mangis kis taamaam taarashish wanasirimsheetsimari chinangtsa. Ashiriya, siysa mangis kis taapi atinaareesa, Apanllee chinangtsa, nuw siyaa atina.

¹⁵Yuw tputs Apanllee chinakana, anoo Apanllsha urutamari ksutkiya. Yuwaa mashkana anoo Apanll uru mazinakiya.

¹⁶Itaru, yuw tputs yutaritshisheetsimari chinaku, anoo nduntam Apanll istakiya. Waani yachimbanllina átu, nda pakchiyam istamaam zandkiya; izuuru mapiykiya.

¹⁷Itaru, yuwsha tputs Apanllee chinaku, ansha kiyung kachiykachu, Apanlleetssha mashku, Apanllsha anoo mazinakchu, tapachindakiya.

¹⁸Apanll waanaatsi tiptsiri uru kapung istamaam zandkiya. Tputssha kapung mang' mantsaku, waani itamsamaam pinasaku, anoo waana Apanllsha tuwizpurtakiya.

¹⁹Tputs Apanllee mangpatari chinaku, kapung kiyung kachiykitaa, Apanllsha anoo istaku tapachindakiya.

²⁰Apanll waanaa tiptsiri kizpur ksutku, wanap nda minamtiyam ichipchiya.

²¹Yutaritshishpansha tputs waanamandari yutaritshishirini tsipachinlliniya. Apanllee tiptsiri natsaksin, Apanllsha anumand izuuru wanichiya.

²²Itaru, Apanll urutamari tiptsiree tapachindachiya. Yuw tputs Apanllee chinakana, anoo nda wanichiya. Ayamtaatiya tiptsiree wanicheeja, ndambaree. Ashirucha, nuwaa kuki mazinangtsa. Watam nuw siyaa tayaspatakuri atinawa.