SALMOS 33:8-19

⁸Nochi antlaltipac ehuani xijhueyitlepanitaca TOTECO. Quena, nochi catli anitztoque ipan ni tlaltipactli xiquimacasica.

⁹Pampa nochi catli yaya quiijto, ya nopa mochijqui. Huan catli yaya tlanahuati ma eli, ya nopa monexti.

¹⁰TOTECO quinsosolhuilía inintlalnamiquilis masehualme ipan campa hueli tlalme para amo ma quichihuaca catli fiero moilhuijtoque. San tlailpitzas huan quincuapolos tlalme para amo huelise quichihuase catli fiero quisencajtoque quichihuase.

¹¹Pero catli TOTECO moilhuijtoc quichihuas amo quema mopatlas. Catli ya quinequi, ya nopa elis para nochipa.

¹²Paquij masehualme ipan nopa tlali catli motemachíaj ipan TOTECO. Quena, nelía paquij nopa masehualme catli TOTECO quintlapejpenijtoc para iaxcahua.

¹³TOTECO catli itztoc nepa ilhuicac techhualtlachilijtoc nochi timasehualme.

¹⁴Hasta nepa ipan ilhuicac TOTECO techtlachilijtoc catli tiitztoque ipan ni tlaltipactli.

¹⁵Yaya TOTECO catli techyolchijchijqui nochi titlaltipac ehuani huan techtlachilía nochi catli tijchijtinemij.

¹⁶Se hueyi tlanahuatijquetl amo tlatlani pampa quinpiya miyac isoldados. Niyon se soldado catli motemaca amo tlatlani pampa quipiya miyac fuerza.

¹⁷Amo ximotemachi ipan se cahuayo para mitzmanahuis masque nelía tetic. San ica ifuerza amo hueli temanahuía.

¹⁸Pero TOTECO, quena, yaya nochipa techtlachilijtoc tojuanti catli tiquimacasij tiquixpanose. Techmocuitlahuía catli timochiyaj ipan itlaicnelilis.

¹⁹Techmanahuía quema tiitztoque nechca miquilistli. Huan techtlamacas quema oncas mayantli para noja ma tiitztoca.