SALMOS 31:6-19

⁶Bi de chawa'a benne' ka' ẕka'n ẕéngake' lo'a ka', san neda' žx̱en ḻaža'a Le', X̱ana' Dios.

⁷Yebéḻe'ela', na' soa' chawe' dan' nži'ilo' neda' na' ẕḻe'ekzlo' ẕzáka'ḻi'a. Nnezlo' ka ẕdia' ḻo da' žsáka'ḻe'egake' neda'.

⁸Bi bdio' neda' ḻo na'gak benne' ka' ẕžá'agake' neda'. Bzoa chocho' neda' to latje chawe'.

⁹Beyache' ḻaže'l neda', X̱ana' Dios, dan' ẕzáka'ḻi'a. Ba bebíž nis da' yožen yej ḻawa', na' žak nyache' ḻaža'a ḻo be' da' nakkza', na' ḻo beḻa' žen chia'.

¹⁰Dan' ẕde yeḻa' nban chia' ḻo da' ẕzáka'ḻi'a, ẕdia' yiz chia' ka' ẕbeže ḻaža'a, na' žedó ḻaža'a dan' nbaga'a ẕia, na' ẕlagak žit yoa'a.

¹¹Benne' ka' ẕžá'agake' neda' gon dítjgekle' neda', na' benne' ẕjo'o ḻi'a chia' ka' žon dítjgekle' neda'. Benne' ka' zej nónbi'e neda' ẕkwásgake' gan zoa', na' benne' ka' ẕḻé'egekle' neda' ḻo nez žẕónnjgake'.

¹²Goḻ ḻáže'gake' neda' ka žóngake' che to benne' gat. Naka' neda' ka to ye'n yo da' nla'an.

¹³Ženla' da' ẕnnegak benne' zante chia', na' gáte'teze zoa da' ẕcheben neda' dan' žóngake' toze diža' bi da' góngake' chia', na' žak ḻáže'gake' gótgake' neda',

¹⁴san neda' žx̱en ḻaža'a Le', X̱ana' Dios. Ẕnnia' nako' Le' Dios chia'.

¹⁵Ḻo no'o Le' žape chi'o ža chia' ka'. Beslá neda' ḻo na'gak benne' ka' ẕžá'agake' neda', na' ḻo na'gak benne' ka' ẕbia ḻáže'gake' neda'.

¹⁶Ḻo yeḻa' ẕen chio' bwia neda', wen žin chio'. Ḻo yeḻa' žeyache' ḻaže' chio' beslá neda'.

¹⁷Bi go'o latje yedoe'ela', X̱ana' Dios, dan' žḻiža' Le'. Ben ga yedoé'egekle benne' ka' ẕbej yíchjgake' Le'. Ben ga soa žígake' ḻo yi' gabíl.

¹⁸Bnnita' ži benne' ka' žon ḻáže'gake', benne' ka' ẕnnégake' chegak benne' chawe' ka', dan' ẕnnágake' ḻo yeḻa' ẕka'n ẕen kwin, na' ḻo yeḻa' žon ditjle.

¹⁹Ẕente nak yeḻa' ži'i ḻaže' chio' dan' napo' nich bi da' gono' chegak benne' ka' žápegake' Le' ba la'ne, dan' žonno' chegak benne' ka' žx̱en ḻáže'gake' Le' ḻawgak yógo'te benne' ka'.