Salmos 31:5-23

⁵Maquiquimanmi almäta entregaycö. Gamga aunishayquita cumlej cashpayquimi salbamashcanqui.

⁶Nogaga Tayta Diosllamanmi llapan shongöpa yäracö. Manacaj ïdulucunaman yäracojcunataga chiquëmi.

⁷Cuyamaptiquimi fiyupa cushicö. Gamga ricashcanquimi imano llaquicuycashätapis. Musyanquimi imano ñacaycashätapis.

⁸Chiquimajcunapa munayninmanga manami cachaycamashcanquichu. Nogataga alli pachamanmi churamashcanqui.

⁹Tayta Dios cuyapaycamay ari. Fiyupami llaquicuycä. Llaquicur wagaycällarnami mana ricänapischu. Intëru cuerpömi pasaypa nanapäcuycan. Shongöpis fiyupami ushaycan.

¹⁰Wagaycällarnami waran-waranllanta auquinyaycä. Llaquicuycaptillänami callpäcunapis ushacäcusha. Intëru cuerpöpis pasaypami gotucäcusha.

¹¹Nogataga chiquimajcuna fiyupami jamurpäman. Bisïnöcunapis asipämanmi. Rejsinacushäcunapis melanäcamanmi. Cällicho ricamajcunapis nogapita ayguicun.

¹²Wañojcunatanönami nogataga gongaycamasha. Shallusha puyñunömi caycä.

¹³Shap-shapyayllapami nogapäga llapanpis parlarcaycan. Nogapäga juc yarpayllami llapanpis parlacun. Wañuchimänanpämi parlacurcaycan. Intërupami manchariypaj caycan.

¹⁴Tayta Dios, imano captinpis gamllamanmi yäracamö. Chaymi noga niycä «¡Gammi Diosnë canqui!» nir.

¹⁵Nogaga gampa maquiquichömi cawaycä. Salbaycamay ari chiquimashpan gaticachaycämajcunapita.

¹⁶Cuyapaycamay gamta sirbishoj uywayniquitaga. Cuyacoj cashpayqui salbaycamay ari.

¹⁷Tayta Dios, gammanmi gayacamö. ¡Pengaychöga ama cachaycamaychu ari! Fiyucunata pengaymanga churaycuy. Pantiyun uchcullachöna ushacächun.

¹⁸Llullacunawan, asipar manacajman churacojcuna, alli cacojcunata abusapar gallaripajcunaga illgächun.

¹⁹Rispitashojcunapäga allitami ruranqui. Chay allicunatami paycunapäga goritano shuyaraycächinqui. Chaycunataga waquin runacuna ricananpärämi gamman yäracamojcunata tarichinqui.

²⁰Paycunataga gammi ñaupancho car salbanqui fiyu runacunapita. Gammi Wasiquiman pacashpayqui washanqui washa-rimacunapita.

²¹Alabasha cachun Tayta Diosga. Paymi cuyapäcoj cashpan yanapämasha fiyupa ñacaycho caycashä öra.

²²Fiyupa manchariycashä örami yarparä «Tayta Diosga manami yarpämannachu» nir. Chaypis yanapämänayquipaj mañacamuptëga yanapämashcanquimi.

²³Tayta Diosman mana cachaypa yäracojcunaga payta cuyay. Chayno runacunataga Tayta Dios allimi rican. Alli-tucojcunatami ichanga imanöpis cashanpita castigan.