SALMOS 31:5-20

⁵Nimitzmactilía notonal momaco. Xinechmanahui, TOTECO, ta tlen tieli nopa Dios tlen titemachtli.

⁶Niquincocolía nochi tlen quinhueyichihuaj teteyome, pampa teteyome ax tleno hueli quichihuaj. Pero na nimotemachijtoc ipan ta, TOTECO.

⁷Nijpiya miyac paquilistli pampa tinechicnelía. Ta tiquitztoc nochi nocuesol, tiquixmajtoc nochi tlen nopantitoc.

⁸Amo xinechtemactili ininmaco nocualancaitacahua. ¡Axtle! Campa tinechquetzqui eli tlacualca huan temachtli.

⁹TOTECO, xinechtlasojtla pampa niitztoc ipan cuesoli. Nisenchocatoc hasta nijmati tlantiyohuij noixtiyolhua. Ipan noyolo huan notlacayo nijmati nitlamitlaijiyohuijtoc ica cuesoli.

¹⁰Ni tlacuajcualocayotl nechtzontlamiltía pampa san cuesoli nijmati. Sesen xihuitl tlen pano san niayijtía. Ya tlantinemi nochicahualis ipampa notlajtlacolhua hasta ya nitlacayohuactinemi.

¹¹Nocualancaitacahua huan hasta nocalnechcahua nechijiyaj. Tlen nechixmatij nechimacasij. Tlen nechitaj ojtipa nechtlalcahuíaj.

¹²Nochi tlacame nechilcajtoque queja ya nimictosquía. Nechtlahuelcajtoque queja se chachapal tepalcatl ipan tlasoli.

¹³Nijcaqui quejatza nocualancaitacahua nechistlacahuíaj. Yeca nechitzquitoc se hueyi majmajtli huan nechmajmatía. Inijuanti san sejco moijilhuíaj quejatza huelise nechmictise.

¹⁴Pero TOTECO, na nimotemachía ipan ta huan niquijtohua: “¡Taja tinoDios!”

¹⁵Sesen tonali tlen niitztoc momaco eltoc. Xinechmanahui ininmaco nocualancaitacahua tlen nechtlaijiyohuiltijtinemij.

¹⁶TOTECO, ma monextis moteicnelijcayo ipan moxayac quema tinechtlachilía na, nimotlatequipanojca. Xinechmaquixti pampa ta tinechsenicnelijtoc.

¹⁷TOTECO, na nimitztemojtoc. Amo xiquincahuili para ma nechpinahualtica. Xiquinpinahualti tlacame tlen ax cuajcualme. Quena, inijuanti mocamatzacuase quema tiquintzontlamiltis.

¹⁸TOTECO, ayoc molinis ininnenepil inijuanti tlen istlacatij quema ya mictose. Ayoc itztose inijuanti tlen mohueyimatij quema camatij para techtlaijilhuise tojuanti tlen tinemij xitlahuac moixpa. Quena, xiquinmicti tlen mohueyitlalíaj huan techmahuispolohuaj.

¹⁹Pero ta, nelía hueyi moyolo ica inijuanti tlen mitztlepanitaj huan tiquinmocuitlahuía. Nelía cuali moteicnelilis tlen ticajcoctoc para tojuanti tlen timotemachijtoque ipan ta, tojuanti tlen tlamiyacapa titematiltijtoque para san ta tihueli titechmanahuis.

²⁰TOTECO, ta techtlatía campa ixtacatzi tojuanti tlen timitztlepanitaj, huan nepa ta timocahua tohuaya. Yeca fiero tlacame ax huelij techajsise ica tlen quisencajtoque. Quena, momaco titechtlatía huan axaca tlen techmahuispolohua hueli techajsis.