Salmos 31:3-21

³Bab-Jehová, be an-akwasaila-gandikid-dukuedid, an-abonoged-neggandikidid. Degisoggu, be-nug-sabed-ular, be an-idue, be an-nide.

⁴Bab-Jehováʼye, an-isdarmaladi emar-yamoged-igar-an-idu-mesismaladgi be an-ollor-imake, ar bedi an-dukuedid.

⁵Bab-Dummad, be-argangi an-san-burba an uksun. Bab-Dummad-Jehová-napiragwad, bee be an-abonosad.

⁶Dule-ibmar-babyob-imakleged-e-nug-odummodimalad an isdar-daked. Ar andi, Bab-Jehováʼgi bensulid.

⁷Bab-Jehová, an be-sabguedgi yeer itoged, an egi wergubalid. Ar bedi an-ulubgi-naibi-itoged daksad, an-ulubgi-surbinsa-itoged be wisid.

⁸Bab-Jehová an-isdarmaladga be an-uksasulid, be an-ollor-imaksad.

⁹Bab-Jehováʼye, wile be an-dake, ar andi surbinsa-itoged. An wile-itogedba an-ibya mommoleded, an-abagan, an-ulub bela nunmaked.

¹⁰An-naibi-itogedba bela an-abagan nollomakded, an bukib-binsaedbi birgamar onamaid. An-isgued-ular, an-gangued bela berguded, an-garmar bela nollomakded.

¹¹Bela an-isdarmaladga an ibmar-dodogedga gued, an-neg-dikarba-mamaid bur bule angi dodomalad. Dulemar-magar-an-dakmalad an-dakalile, an-dobguddamalad, ¡Dulemar igarba an-abingualile, angi gwakiddamalad!

¹²Burgwisayobi dulemar bar angi binsasulid, nog-mamarisayobi an gunonikid.

¹³Dulemar-bukidar emargi-gakansaar-sunmakmar an itoged. An bia naddibe, an dobee itoged. Ar dulemar angi-aibinega na atosmalad, an-oburgwedgi binsamalad.

¹⁴Bab-Jehová, ar andi begi bensulid. Andi soged: “¡Be an-Bab-Dummadye.

¹⁵An be-nugginbi gudiiye!” An-isdarmaladgi, an-balegindimaladgi, be an-ollor-imake.

¹⁶Bab-Jehováʼye, angi be nued binsae, ¡Be-sabgued-dummad-nikadba be an-abonoge!

¹⁷Bab-Jehováʼye, ar an bese gochasoggu, mer bingeguega be an-imake. Dule-isganamardi bingeguega be imake, gaya-bogidiki burgwarmalad-meged-galugi be mese.

¹⁸Dule-gakansilimar-e-gaya bogidik be imake. Na san-dummarba-imakedba, dule-mesagwar-imakedba, dule-nuedgi ibmar-sabsur-sogdimalad.

¹⁹Bab-Jehová, be-sabgued ibiyobi dungue. Dule-be-nug-odummodimaladga, be-sabed be oyoged. Dulemar-wagab, dule-begi-bengusurmaladga, be-sabgued be oyoged.

²⁰Bab-Jehová, dule-nued dule-egi-isdar-binsaedgi, be-walik be odukued. Dule-nued dule-urwedginbi-sunmakmaladgi, bese-goled-neg-sunna-selegedgi be odukued.

²¹Bab-Jehová-nug an odummosun. Ar sordamar neggwebur-ebiris an-oburgwega bukwagusmargu, e-sabgued-dummad anga oyosad.